پرەزيدەنت: بانكتەر ەكونوميكاۇا كوبىرەك قارجى قۇيۋى ءتيىس

فوتو: اشىق دەرەككوز

پرەزيدەنت قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى جولداۋىن جاريالاپ جاتىر, دەپ جازادى qandastar.kz

مەملەكەت باسشىسى الدا اتقارىلۋى كەرەك جۇمىستاردىڭ ناقتى باعىتىن ايتتى.

«ءبىرىنشى. اقشا-نەسيە ساياساتى مەن فيسكالدى ساياساتتىڭ اراسىنداعى ۇيلەسىمسىزدىكتى جويۋ قاجەت.

قازىر ناقتى سەكتورعا نەسيە ءالى دە ويداعىداي بەرىلمەي جاتقانىن اشىق ايتۋىمىز كەرەك. شاعىن جانە ورتا بيزنەستى جەتكىلىكتى قارجىلاندىرۋ ماسەلەسى دە شەشىمىن تاپقان جوق. بۇل جاعداي ەلىمىزدەگى ىسكەرلىك ورتانىڭ بەلسەندىلىگىنە, ەكونوميكانىڭ تۇراقتىلىعىنا جانە دايەكتى دامۋىنا كەدەرگى كەلتىرىپ وتىر. ۇكىمەت پەن ۇلتتىق بانك بىرلەسىپ, وسىعان قاتىستى وڭتايلى شەشىمدەر ويلاستىرۋى كەرەك. بانكتەردىڭ ەكونوميكاعا كوبىرەك قارجى قۇيۋىنا جاعداي جاساۋ قاجەت.

حالىقارالىق ساراپشىلار قازاق بانكتەرىن رەسۋرسقا باي ەلدەر ىشىندەگى ەڭ كوپ پايدا تاباتىن بانكتەر ساناتىنا قوسادى. سوندىقتان وسى سالاداعى سالىق مولشەرى ءادىل بەلگىلەنۋگە ءتيىس. بانكتەردىڭ اكتسيونەرلەرى ديۆيدەندىنە سايكەس سالىق تولەۋى كەرەك. بانكتەرگە مەملەكەت كورسەتكەن كومەك تۇرعىسىنان قاراساق, بۇل – وتە ورىندى ۇستانىم. تسيفرلىق اكتيۆتەردىڭ اينالىمىن قامتاماسىز ەتۋ جانە بانك سالاسىنا يننوۆاتسيالاردى قاۋىپسىزدىك تالابىنا سايكەس ەنگىزۋ ءۇشىن ونى رەتتەيتىن تەتىكتەردىڭ تۇراقتى بولۋى ماڭىزدى», دەدى پرەزيدەنت.

قاسىم-جومارت توقاەۆ قازىرگى قولدانىستاعى بانكتەر تۋرالى زاڭنىڭ 30 جىل بۇرىن قابىلدانعانىن ەسكە سالىپ, جاڭا زاڭ قاجەت ەكەنىن اتاپ ءوتتى.

«بىزگە بانكتەر تۋرالى جاڭا زاڭ قاجەت. بۇل قۇجاتتا ەكونوميكالىق بەلسەندىلىكتى قولداۋ جانە فينتەح سالاسىن قارقىندى دامىتۋ سياقتى وزەكتى ماسەلەلەر شەشىمىن تابۋى كەرەك. قازىر قولدانىپ جۇرگەن زاڭ شامامەن 30 جىل بۇرىن قابىلدانعان. ول كەزدە زامان دا مۇلدە باسقا بولدى.

اشىعىن ايتۋىمىز كەرەك, بىزدە رەسپۋبليكالىق بيۋدجەتتىڭ كىرىس بولىگى ورىندالماي جاتىر. بۇل – بۇرىنعى جانە قازىرگى ۇكىمەت جۇمىسىنداعى ۇلكەن ولقىلىق. مۇنداي جاعداي ءجيى قايتالانسا, تۇپتەپ كەلگەندە, ەلىمىزدىڭ دامۋىن تەجەيدى. سوندىقتان وعان جول بەرمەۋ قاجەت. بيۋدجەت قارجىسىن ءتيىمدى پايدالانىپ, ونىڭ شىعىس بولىگىن شەكتەپ, قاتاڭ باقىلاۋدا ۇستاعان ءجون. ۇكىمەت ۇلتتىق بانكپەن بىرلەسىپ, وسى ماسەلەگە قاتىستى ناقتى شارالار قابىلداۋعا ءتيىس», دەدى مەملەكەت باسشىسى.