Prezıdent Batys Qazaqstan oblysynyń sý basqan aýmaqtaryn tikushaqpen aralady

Memleket basshysynyń Batys Qazaqstan oblysyna jumys sapary qarǵyn sý basqan aýmaqtardy tikushaqpen aralap kórýden bastaldy.

Qasym-Jomart Toqaev Terekti, Syrym jáne Qaratóbe aýdandaryndaǵy qalyptasqan jaǵdaımen tanysty.

Oblys ákimi Narıman Tóreǵalıev Prezıdentke búginde 6 aýdan men Oral qalasyn sý basqanyn baıandady. Qarǵyn sý 552 turǵyn úıge, 427 saıajaı telimine zııan keltirgen. О́ńir basshysynyń aıtýynsha, sý tasqynyna qarsy sharalarǵa 1911 adam, 332 tehnıka, 101 motopompa, 1 tikushaq jumyldyrylǵan. Sonymen qatar qutqarý jumystaryna Almaty jáne Mańǵystaý oblystarynyń qutqarýshylary atsalysyp jatyr. Qarǵyn sý basqan aýmaqtardan 7 myńǵa jýyq turǵyn kóshirilgen, jedel-evakýaııalaý pýnktteri qurylǵan. Zardap shekkenderge birjolǵy materıaldyq kómek kórsetý úshin jergilikti bıýdjet esebinen 63 mıllıon teńge qarjy bólindi. Sý aıdaý, nysandardyń jan-jaǵyn topyraqpen qorshaý jáne sý júretin qubyrlardy keńeıtý jumystary júrgizilip jatyr.