Prezıdent Birikken Ulttar Uıymy reformalaýdy qajet etetinin meńzedi

Aqordanyń habarlaýynsha, 2003 jyldan beri uıymdastyrylyp kele jatqan halyqaralyq jıyn bıyl «Dıalog, dıplomatııa jáne alýantúrlilik» (Diplomacy, Dialogue and Diversity) taqyrybyna arnaldy.

Qatar astanasyndaǵy aıtýly is-sharada geosaıasat, ekonomıkalyq damý, jańa tehnologııalar,  jasandy ıntellekt, energetıka jáne azyq-túlik qaýipsizdigi sekildi ózekti máseleler talqylanady, sondaı-aq qazirgi zamannyń negizgi problemalaryn sheshýge baǵyttalǵan usynys-pikirler aıtylady.

Memleket basshysy Newsmaker Interview formatyndaǵy arnaıy sessııaǵa qatysyp, moderator, SNN jýrnalısi Djýlııa Chatterleıdiń suraqtaryna jaýap berdi.

Qazaqstan Prezıdenti, eń aldymen, BUU-nyń tıimdi qyzmetiniń mańyzy men orta derjavalardyń ýaqyt ótken saıyn artyp kele jatqan róli týraly aıtty.

«BUU ámbebap uıym retinde adamzat úshin óte qajet. Sebebi onyń balamasy joq. О́kinishke qaraı, iri derjavalar álemdegi beıbitshilik pen turaqtylyqty tolyq saqtaı almaı otyr. Al búgingi ahýal kóptegen eldi, sonyń ishinde Qazaqstandy da alańdatady. Sondyqtan Birikken Ulttar Uıymy reformalaýdy qajet etedi. Iri derjavalar arasynda ymyralastyq bolýy kerek dep sanaımyz. Olardyń kelisimge kele almaýy saldarynan Qaýipsizdik Keńesi tyǵyryqqa tireldi. Qazaqstan sııaqty orta derjavalar aımaqtyq deńgeıde, sondaı-aq jahandyq keńistikte beıbitshilik pen qaýipsizdikti ilgeriletýde óte mańyzdy ról atqara alady», – dedi Qasym-Jomart Toqaev.