جاڭالىقتار
پرەزيدەنت بيزنەس وكىلدەرىمەن كەزدەستى
فوتو: اقوردا
مەملەكەت باسشىسى قاسىم-جومارت توقاەۆ وتاندىق بيزنەس وكىلدەرىمەن كەزدەسۋىندە ەلىمىزدەگى ىسكەرلىك احۋالدى جاقسارتۋ ەڭ باستى ماقساتتاردىڭ ءبىرى ەكەنىن ايتتى, دەپ حابارلايدى qandastar.kz
«كۆازيمەملەكەتتىك سەكتور سۋبەكتىلەرىن قۇرۋعا موراتوري ەنگىزىلدى. رەتتەلەتىن ساتىپ الۋلارعا بيزنەس وكىلدەرى ءوتىنىم بەرگەن جاعدايدا, وعان مەملەكەتتىك كاسىپورىنداردىڭ قاتىسۋىنا زاڭ جۇزىندە شەكتەۋ قويىلدى. بيزنەستى نەگىزسىز قىسپاققا الۋدان جانە سالالىق ورگانداردىڭ زاڭسىز تەكسەرۋىنەن قورعاۋ ءۇشىن جۇيەلى جۇمىس قولعا الىندى. قىلمىستىق كودەكستىڭ بەس بابى ىزگىلەندىرىلدى. ەكى باپ بويىنشا قىلمىستىق جاۋاپكەرشىلىككە تارتۋ تالاپتارى جوعارىلادى, ەكونوميكالىق قۇقىق بۇزۋشىلىقتىڭ 29 ءتۇرى بويىنشا تۇتقىنداۋعا تىيىم سالىندى. 2022 جىلدان بەرى كاسىپكەرلىك سالاسىندا تىركەلگەن قىلمىستىق ىستەردىڭ سانى ەكى ەسە قىسقاردى. بۇدان بولەك, كاسىپكەرلىك قىزمەتكە زاڭسىز ارالاسقانى ءۇشىن اكىمشىلىك جاۋاپكەرشىلىك كۇشەيتىلدى. ينۆەستورلاردى نەگىزسىز تەكسەرۋدىڭ, ولارعا ايىپپۇل سالۋدىڭ الدىن الىپ, رۇقساتتاما بەرۋگە كەدەرگى كەلتىرمەس ءۇشىن «پروكۋرور سۇزگىسى» ەنگىزىلدى. بۇگىندە پروكۋرورلار ينۆەستور قۇقىعىن بۇزاتىن 700-دەن اسا فاكتىگە توسقاۋىل قويدى. مۇنىڭ ءبارى بيزنەستىڭ قۇقىعى مەن زاڭدى مۇددەسىن قورعاۋعا زور ىقپال ەتتى», — دەدى مەملەكەت باسشىسى.
ەسكە سالا كەتەيىك, بۇعان دەيىن مەملەكەت باسشىسى وتاندىق بيزنەس وكىلدەرىمەن كەزدەسۋىندە قوسىلعان قۇن سالىعىنىڭ مولشەرلەمەسى سارالانىپ بەلگىلەنۋگە ءتيىس ەكەنىن اتاپ وتكەن بولاتىن.
