جاڭالىقتار
پرەزيدەنت بۇكىلالەمدىك تاەكۆوندو فەدەراتسياسىنىڭ (WT) پرەزيدەنتىمەن كەزدەستى
فوتو: اقوردا
پرەزيدەنت قاسىم-جومارت توقاەۆ چۋنگۆون چوۋدىڭ ساپارى قازاقستاننىڭ سپورت قاۋىمداستىعى ءۇشىن ماڭىزدى وقيعا سانالاتىنىن اتاپ ءوتتى. سونداي-اق بۇل بۇكىلالەمدىك تاەكۆوندو فەدەراتسياسىنىڭ ەلىمىزدە اتالعان سپورت ءتۇرىنىڭ دامۋىنا جان-جاقتى قولداۋ كورسەتۋگە دايىن ەكەنىن بىلدىرەدى, دەپ جازدى qandastar.kz
مەملەكەت باسشىسى تاەكۆوندو وليمپيادالىق سپورت ءتۇرى عانا ەمەس, ۇيلەسىم, ءتارتىپ جانە ءوزارا قۇرمەت قاعيداتتارىنا نەگىزدەلگەن, دۇنيە جۇزىندەگى ميلليونداعان ادامدى بىرىكتىرەتىن فيلوسوفيا دەپ سانايدى.
قاسىم-جومارت توقاەۆتىڭ ايتۋىنشا, ەلوردادا G1 ساناتىنداعى Kazakhstan Open 2025 حالىقارالىق رەيتينگ ءتۋرنيرىن وتكىزۋ وتاندىق سپورتشىلاردىڭ كاسىبي تۇرعىدان شىڭدالۋىنا, تاجىريبە الماسۋىنا ءارى ۇلتتىق فەدەراتسيانىڭ باسەكەگە قابىلەتتىلىگىن كوتەرۋگە كەڭىنەن جول اشادى.
مەملەكەت باسشىسى بىرلەسكەن كۇش-جىگەردىڭ ناتيجەسىندە قازاقستاندا تاەكۆوندونىڭ تانىمالدىلىعى ارتىپ, حالىقتار اراسىنداعى بايلانىس نىعايا تۇسەتىنىنە سەنىم ءبىلدىردى.
چۋنگۆون چوۋ قوناقجايلىق تانىتىپ, قازاقستاندا تاەكۆوندونىڭ دامۋىنا ءاردايىم قولداۋ كورسەتىپ كەلە جاتقانى ءۇشىن پرەزيدەنت قاسىم-جومارت توقاەۆقا العىس ايتتى.
بۇكىلالەمدىك فەدەراتسيا باسشىسى ەرتەڭگى ءتۋرنيردىڭ ۇيىمداستىرىلۋىنا جانە ەلىمىزدەگى وسى سپورت تۇرىنە قىزىعۋشىلىق دەڭگەيىنە جوعارى باعا بەردى. سونىمەن قاتار قازاق سپورتشىلارىنىڭ حالىقارالىق ارەناداعى تابىسىنا توقتالدى.
قازاقستان پرەزيدەنتى الەمدە تاەكۆوندونىڭ دامۋىنا ەلەۋلى ۇلەس قوسقانى ءۇشىن چۋنگۆون چوۋدى ءىى دارەجەلى «دوستىق» وردەنىمەن ماراپاتتادى.
