پرەزيدەنت: بيۋدجەت قارجىسى تەك وزەكتى ماسەلەلەرگە جۇمسالادى

فوتو:Aqorda

بۇگىن ۇكىمەتتىڭ كەڭەيتىلگەن وتىرىسى ءوتتى. مەملەكەت باسشىسى قاسىم-جومارت توقاەۆ كۇنتارتىبىندە تۇرعان وزەكتى ماسەلەلەرگە توقتالىپ, ۇكىمەتكە بىرقاتار تاپسىرما بەردى, دەپ جازدى qandastar.kz

«سىرتتاعى احۋال كۇردەلى بولسا دا, ەلىمىزدە جاقسى ناتيجەلەر بار. ەل ەكونوميكاسى ءوسىپ جاتىر. بىراق شەشىمىن تاپپاعان تۇيتكىلدەر ءالى دە كوپ.

قازىرگى تاڭداعى باستى ماسەلە مىناداي. الەم ەكونوميكاسىندا بولىپ جاتقان تاريفتىك تارتىستار مەن سانكتسيالىق تەكەتىرەستەر قالىپتى جاعدايعا اينالدى. بۇل ۇدەرىستىڭ سالدارى جويقىن بولۋى مۇمكىن.

كليماتقا بايلانىستى ۇستانىمدار دا ۇلكەن وزگەرىسكە ۇشىرايتىن بولدى. مۇنداي جاعدايدا «جاسىل ەنەرگەتيكانى» دامىتۋ تاسىلدەرىن قايتا قاراۋعا تۋرا كەلەدى. ءبىر جاعىنان, ءداستۇرلى قۋات كوزدەرىنە دەگەن سۇرانىس ساقتالادى. ەكىنشى جاعىنان, بۇل مۇناي, گاز جانە كومىر باعاسىنىڭ تۇراقسىزدىعىنا اكەپ سوقتىرادى.

قارجى سالاسىندا كريپتوۆاليۋتالار مەن باسقا دا تسيفرلىق اكتيۆتەر كەڭىنەن قولدانىلا باستادى. جاساندى ينتەللەكتىنى دامىتۋ الدىڭعى قاتارعا شىقتى, سوعان بايلانىستى تەحنولوگياسى دامىعان الىپ ەلدەر اراسىندا باسەكە قىزا تۇسپەك. جاڭا ءداۋىردىڭ سىن-قاتەرلەرى از ەمەس. ونى ەڭسەرۋ ءۇشىن بىزگە ءتيىستى ستراتەگيا كەرەك.

مەن رەفورمالاردىڭ ناقتى باعىتى مەن ونى جۇزەگە اسىرۋ جولدارى تۋرالى وسىعان دەيىن دە ايتتىم. ۇكىمەت ەل ەكونوميكاسىن تۇرالاپ قالۋدان ساقتاپ, ورنىقتى دامۋدى قامتاماسىز ەتۋ ءۇشىن كۇردەلى شەشىمدەر قابىلداۋى كەرەك جانە ەڭ باستىسى سول شەشىمدەردى ىسكە اسىرۋعا ءتيىس. بۇل – جوعارى بىلىكتى ءارى جاۋاپكەرشىلىك الۋعا دايىن مەملەكەتتىك قىزمەتشىلەردىڭ قولىنان كەلەتىن جۇمىس. الەمدىك تاجىريبەگە قاراساق, مەملەكەتتىك اپپاراتتىڭ تيىمدىلىگى وسىنداي كۇردەلى كەزەڭدەردە ايقىن كورىنەدى.

ۇكىمەت قانشالىقتى قيىن بولسا دا, جاپپاي ۇنەمدەۋگە كوشىپ, بيۋدجەت قارجىسىن تەك قانا اسا وزەكتى ماسەلەلەردى شەشۋگە جۇمساۋى كەرەك. كورپەگە قاراي كوسىلەتىن ۋاقىت كەلدى. ورىنسىز شىعىندى توقتاتىپ, اياعىمىزدى تارتىپ باسۋ قاجەت», – دەدى پرەزيدەنت.