پرەزيدەنت ەكونوميست باسشىلاردىڭ قازىرگى جۇمىسىن باعالادى

فوتو: اشىق دەرەككوز

پرەزيدەنت ەكونوميست باسشىلاردىڭ قازىرگى جۇمىسىن ورتاشا دەپ باعالاپ, تەڭگەنىڭ جاي-كۇيىنە توقتالدى, دەپ حابارلايدى qandastar.kz.

– ۇكىمەتتىڭ مىندەتى – ەكونوميكانىڭ ءوسىمىن قامتاماسىز ەتۋ جانە ازاماتتاردىڭ ءال-اۋقاتىن جاقسارتۋ. جالپى العاندا, مينيسترلەر كابينەتى بۇل مىندەتىن ورىنداپ وتىر. ەكونوميكانى ءارتاراپتاندىرۋ, وڭدەۋ ونەركاسىبىن دامىتۋ, ينفراقۇرىلىمدى جاڭعىرتۋ سياقتى باعىتتار بويىنشا بىلتىر اتقارىلعان جۇمىستىڭ ناتيجەلەرى جامان ەمەس. الايدا ءبارى ءمىنسىز دەۋگە كەلمەيدى, پروبلەمالار دا بار.

مەن مينيسترلەردەن نەعۇرلىم ءتيىمدى جۇمىس ىستەۋدى جانە شەشىم قابىلداعاندا باتىل بولۋدى ۇنەمى تالاپ ەتەمىن. قوعام دا ۇكىمەتتىڭ جۇمىسىنا جوعارى تالاپ قويادى. بۇل – وتە ورىندى ءارى قالىپتى جاعداي. سوندىقتان ۇكىمەتتىڭ جۇمىسى ناقتى ناتيجەگە وراي, ءادىل باعالانادى. باستى كورسەتكىش – ازاماتتاردىڭ تۇرمىس ساپاسى. ەكونوميكاداعى جەتىستىكتەر ادامداردىڭ كۇندەلىكتى ومىرىنە وڭ اسەرىن تيگىزبەسە, ونى انشەيىن ءسوز جۇزىندەگى جەتىستىك دەۋگە بولادى.

پرەزيدەنت جاقىندا ۇكىمەتتىڭ كەڭەيتىلگەن وتىرىسى وتەتىنىن ايتتى. سول كەزدە جىلدى قورىتىندىلاپ, قازىرگى ماسەلەلەردى تالقىلاپ, جاڭا جوسپارلار جاسالماق. قازاقستانعا ەكونوميكانىڭ 4 پايىزدىق ءوسىمى ازدىق ەتەتىنى انىق. بۇل تۋرالى مەملەكەت باسشىسى  شەتەل وكىلدەرىنە دە ايتىپ جۇرگەنىن مالىمدەدى. ۇكىمەت ەكونوميكانى بارىنشا دامىتۋ ءۇشىن تىڭ تاسىلدەر تابۋعا ءتيىس.

«دوللاردىڭ نىعايۋىنان دامۋشى ەلدەردىڭ ۆاليۋتاسى قىسىم كورەدى. زەر سالىپ قاراساق, كوپتەگەن مەملەكەتتىڭ ۆاليۋتاسى قاراشا ايىنان الدەقايدا بۇرىن السىرەي باستادى. ال تەڭگەنىڭ باعامى ۇزاق ۋاقىت تۇراقتىلىعىن ساقتاپ تۇردى.

مەن تەڭگەنى كۇشەيتۋ ءۇشىن ەلىمىزدىڭ التىن-ۆاليۋتا قورىن بوسقا ىسىراپ ەتۋ ورىنسىز دەپ سانايمىن. نارىققا قاتىسى بار كەيبىر قۇرىلىمدار تەڭگە باعامىن باسقارۋعا قولايلى ەتۋ تۋرالى ۇسىنىستار ايتىپ ءجۇر. ۇلتتىق بانك پەن ۇكىمەت ونىڭ ءبارىن مۇقيات قاراستىرىپ جاتىر. ماسەلەنى زەردەلەگەن سوڭ بۇل باعىتتاعى ۇستانىمىمىزدى وزگەرتۋ قاجەت پە دەگەن ساۋالدىڭ جاۋابى بەلگىلى بولادى», – دەدى مەملەكەت باسشىسى.

وسى رەتتە پرەزيدەنت ەكونوميكانى باسقاراتىن ىسىلعان مامان كەرەك ەكەنىن جەتكىزدى.

«اشىعىن ايتسام, ەكونوميست باسشىلاردىڭ قازىرگى جۇمىسىن ورتاشا دەپ باعالايمىن. ولار حالىقارالىق قارجى ينستيتۋتتارىنىڭ تىلىمەن ادەمى سويلەيدى, الايدا ناقتى ناتيجەسى بار شارۋا شامالى بولىپ تۇر. قازىر وڭىرلەردەگى احۋالدى جانە ەكونوميكانىڭ ءىس جۇزىندە قالاي جۇمىس ىستەيتىنىن جاقسى بىلەتىن, ياعني جەرگىلىكتى جەردە ەڭبەك ەتىپ, ىسىلعان ماماندار قاجەت», – دەدى پرەزيدەنت.