Prezıdent ekonomıst basshylardyń qazirgi jumysyn baǵalady

Foto: ashyq derekkóz

Prezıdent ekonomıst basshylardyń qazirgi jumysyn ortasha dep baǵalap, teńgeniń jaı-kúıine toqtaldy, dep habarlaıdy qandastar.kz.

– Úkimettiń mindeti – ekonomıkanyń ósimin qamtamasyz etý jáne azamattardyń ál-aýqatyn jaqsartý. Jalpy alǵanda, Mınıstrler kabıneti bul mindetin oryndap otyr. Ekonomıkany ártaraptandyrý, óńdeý ónerkásibin damytý, ınfraqurylymdy jańǵyrtý sııaqty baǵyttar boıynsha byltyr atqarylǵan jumystyń nátıjeleri jaman emes. Alaıda bári minsiz deýge kelmeıdi, problemalar da bar.

Men mınıstrlerden neǵurlym tıimdi jumys isteýdi jáne sheshim qabyldaǵanda batyl bolýdy únemi talap etemin. Qoǵam da Úkimettiń jumysyna joǵary talap qoıady. Bul – óte oryndy ári qalypty jaǵdaı. Sondyqtan Úkimettiń jumysy naqty nátıjege oraı, ádil baǵalanady. Basty kórsetkish – azamattardyń turmys sapasy. Ekonomıkadaǵy jetistikter adamdardyń kúndelikti ómirine oń áserin tıgizbese, ony ánsheıin sóz júzindegi jetistik deýge bolady.

Prezıdent jaqynda Úkimettiń keńeıtilgen otyrysy ótetinin aıtty. Sol kezde jyldy qorytyndylap, qazirgi máselelerdi talqylap, jańa josparlar jasalmaq. Qazaqstanǵa ekonomıkanyń 4 paıyzdyq ósimi azdyq etetini anyq. Bul týraly Memleket basshysy  shetel ókilderine de aıtyp júrgenin málimdedi. Úkimet ekonomıkany barynsha damytý úshin tyń tásilder tabýǵa tıis.

«Dollardyń nyǵaıýynan damýshy elderdiń valıýtasy qysym kóredi. Zer salyp qarasaq, kóptegen memlekettiń valıýtasy qarasha aıynan áldeqaıda buryn álsireı bastady. Al teńgeniń baǵamy uzaq ýaqyt turaqtylyǵyn saqtap turdy.

Men teńgeni kúsheıtý úshin elimizdiń altyn-valıýta qoryn bosqa ysyrap etý orynsyz dep sanaımyn. Naryqqa qatysy bar keıbir qurylymdar teńge baǵamyn basqarýǵa qolaıly etý týraly usynystar aıtyp júr. Ulttyq bank pen Úkimet onyń bárin muqııat qarastyryp jatyr. Máseleni zerdelegen soń bul baǵyttaǵy ustanymymyzdy ózgertý qajet pe degen saýaldyń jaýaby belgili bolady», – dedi Memleket basshysy.

Osy rette Prezıdent ekonomıkany basqaratyn ysylǵan maman kerek ekenin jetkizdi.

«Ashyǵyn aıtsam, ekonomıst basshylardyń qazirgi jumysyn ortasha dep baǵalaımyn. Olar halyqaralyq qarjy ınstıtýttarynyń tilimen ádemi sóıleıdi, alaıda naqty nátıjesi bar sharýa shamaly bolyp tur. Qazir óńirlerdegi ahýaldy jáne ekonomıkanyń is júzinde qalaı jumys isteıtinin jaqsy biletin, ıaǵnı jergilikti jerde eńbek etip, ysylǵan mamandar qajet», – dedi Prezıdent.