جاڭالىقتار
پرەزيدەنت ەل حالقىن تاۋەلسىزدىك كۇنىمەن قۇتتىقتادى
قاستەرلى وتانىمىز ءوسىپ-وركەندەي بەرسىن!
مەملەكەت باسشىسى قازاقستان حالقىن تاۋەلسىزدىك كۇنىمەن قۇتتىقتادى. بۇل تۋرالى اقوردانىڭ ءباسپاسوز قىزمەتى حابارلادى, دەپ جازادى qandastar.kz
«قۇرمەتتى وتانداستار!
سىزدەردى تاۋەلسىزدىك كۇنىمەن قۇتتىقتايمىن!
بۇل – حالقىمىزدىڭ ازاتتىق تۋرالى ارمانى اقيقاتقا اينالىپ, ەلدىك داستۇرلەرىمىز جاڭعىرعان كۇن. وسى مەرەيلى مەرەكەدە ءبارىمىز بابالار اماناتىنا ءاردايىم ادال بولۋدىڭ جانە ۇلت بولاشاعىنا زور جاۋاپكەرشىلىكپەن قاراۋدىڭ ءمان-ماڭىزىن تەرەڭ تۇسىنەمىز. سەبەبى ءتاۋ ەتەر تاۋەلسىزدىگىمىز – بارشاعا ورتاق قۇندىلىق ءارى بارلىق يگىلىگىمىزدىڭ باستاۋىندا تۇرعان باعا جەتپەس بايلىق. تاۋەلسىزدىگىمىزدەن بيىك ەش نارسە جوق. ونى كوزدىڭ قاراشىعىنداي قورعاۋ – ءار ازاماتتىڭ پەرزەنتتىك پارىزى.
بۇگىندە قازاقستان حالىقارالىق دەڭگەيدەگى ابىروي-بەدەلى جوعارى, ستراتەگيالىق باعدارى ايقىن مەملەكەت رەتىندە بولاشاققا نىق سەنىممەن قادام باسىپ كەلەدى. حالقىمىز بۇعان ەسەلى ەڭبەك پەن ىرىستى ىنتىماقتىڭ ارقاسىندا قول جەتكىزدى. ءبىز وسى بەرەكەلى بىرلىگىمىزدى, قوعامداعى تىنىشتىق پەن تۇراقتىلىقتى ساقتاي وتىرىپ, قيىندىقتىڭ بارىنەن سۇرىنبەي وتەمىز. تاۋەلسىز ەلىمىز وركەنيەتتى, وزىق مەملەكەت رەتىندە دامي بەرەدى.
بارشاڭىزعا زور دەنساۋلىق, مول تابىس تىلەيمىن!
قاستەرلى وتانىمىز ءوسىپ-وركەندەي بەرسىن!», — دەدى قاسىم-جومارت توقاەۆ.
