پرەزيدەنت ەلىمىزدە قانشا مەكتەپ سالىناتىنىن ايتتى

فوتو: gov.kz

«كەلەشەك مەكتەپتەرى» ۇلتتىق جوباسى اياسىندا جالپى سانى 217 مەكتەپ قۇرىلىسى جوسپارلاندى. قازىر 128 مەكتەپ سالىندى. بۇل تۋرالى پرەزيدەنت قاسىم-جومارت توقاەۆ ۇستازداردىڭ رەسپۋبليكالىق تامىز كونفەرەنتسياسىندا مالىمدەدى, دەپ حابارلايدى qandastar.kz

«ۇلت ۇستازى احمەت بايتۇرسىنوۆ «مەكتەپتىڭ جانى – مۇعالىم» دەگەن. ءبىز وركەنيەتتى ەل بولامىز دەسەك, ۇستازدارعا بارىنشا جاعداي جاساۋىمىز كەرەك.

مەن ءبىلىم بەرۋ سالاسىنا ايرىقشا ءمان بەرەمىن. 2019 جىلى پرەزيدەنت رەتىندە قابىلداعان العاشقى شەشىمدەردىڭ ءبىرى ۇستازدارعا قاتىستى بولعانىن بىلەسىزدەر.

قازىر – ءبىلىم مەن عىلىمنىڭ زامانى. جاھاندانۋ داۋىرىندە وزىق ءبىلىمدى يگەرگەن, جاڭا تەحنولوگيانى مەڭگەرگەن ەلدىڭ ۇپايى تۇگەل بولادى. بۇگىن سانالى ۇرپاق تاربيەلەي الساق, ەرتەڭ زامان كوشىنىڭ باسىندا جۇرەمىز. سوندىقتان وسى سالانى قولداۋ مەملەكەتتىك ساياساتتىڭ نەگىزگى باسىمدىعى بولىپ قالا بەرەدى.

سوڭعى جىلدارى بۇل باعىتتا اۋقىمدى جۇمىس اتقارىلدى. 2019 جىلدان بەرى ءبىلىم سالاسىنىڭ بيۋدجەتى ءۇش ەسە ارتتى. وسى ۋاقىتتا 1 ميلليوننان استام وقۋشىعا ارنالعان 1 200 مەكتەپ اشىلدى. «كەلەشەك مەكتەپتەرى» ۇلتتىق جوباسى اياسىندا جالپى سانى 217 مەكتەپ قۇرىلىسى جوسپارلاندى. قازىر 128 مەكتەپ سالىندى. بۇدان بولەك, ءبىلىم بەرۋ ينفراقۇرىلىمىن قولداۋ قورىنىڭ قارجىسىنا الپىستان استام مەكتەپ سالىندى. تاعى 30-عا جۋىعى سالىنىپ جاتىر», – دەدى پرەزيدەنت.