Prezıdent elimizde qansha mektep salynatynyn aıtty

Foto: gov.kz

«Keleshek mektepteri» ulttyq jobasy aıasynda jalpy sany 217 mektep qurylysy josparlandy. Qazir 128 mektep salyndy. Bul týraly Prezıdent Qasym-Jomart Toqaev ustazdardyń Respýblıkalyq tamyz konferenııasynda málimdedi, dep habarlaıdy qandastar.kz

«Ult ustazy Ahmet Baıtursynov «Mekteptiń jany – muǵalim» degen. Biz órkenıetti el bolamyz desek, ustazdarǵa barynsha jaǵdaı jasaýymyz kerek.

Men bilim berý salasyna aıryqsha mán beremin. 2019 jyly Prezıdent retinde qabyldaǵan alǵashqy sheshimderdiń biri ustazdarǵa qatysty bolǵanyn bilesizder.

Qazir – bilim men ǵylymnyń zamany. Jahandaný dáýirinde ozyq bilimdi ıgergen, jańa tehnologııany meńgergen eldiń upaıy túgel bolady. Búgin sanaly urpaq tárbıeleı alsaq, erteń zaman kóshiniń basynda júremiz. Sondyqtan osy salany qoldaý memlekettik saıasattyń negizgi basymdyǵy bolyp qala beredi.

Sońǵy jyldary bul baǵytta aýqymdy jumys atqaryldy. 2019 jyldan beri bilim salasynyń bıýdjeti úsh ese artty. Osy ýaqytta 1 mıllıonnan astam oqýshyǵa arnalǵan 1 200 mektep ashyldy. «Keleshek mektepteri» ulttyq jobasy aıasynda jalpy sany 217 mektep qurylysy josparlandy. Qazir 128 mektep salyndy. Budan bólek, Bilim berý ınfraqurylymyn qoldaý qorynyń qarjysyna alpystan astam mektep salyndy. Taǵy 30-ǵa jýyǵy salynyp jatyr», – dedi Prezıdent.