پرەزيدەنت ەربولات دوساەۆتى قابىلدادى

قاسىم-جومارت توقاەۆ الماتى قالاسىنىڭ اكىمى ەربولات دوساەۆتى قابىلدادى, دەپ حابارلايدى qandastar.kz اقپارات پورتالى.

مەملەكەت باسشىسىنا الماتىنىڭ بيىلعى قاڭتار-اقپان ايلارىنداعى الەۋمەتتىك-ەكونوميكالىق دامۋىنىڭ الدىن الا قورىتىندىلارى جانە قالانى وركەندەتۋدىڭ پەرسپەكتيۆاسى باياندالدى. ەربولات دوساەۆتىڭ ايتۋىنشا, اتالعان كەزەڭدە قىسقا مەرزىمدى ەكونوميكالىق ينديكاتور 7 پايىزعا دەيىن ارتقان, جىل قورىتىندىسى بويىنشا وڭىرلىك جالپى ءونىم 6,4 پايىزعا وسەدى دەپ بولجانىپ وتىر.

پرەزيدەنت تاپسىرماسىنا سايكەس, الماتىدا ەكونوميكانى ءارتاراپتاندىرۋ جانە ينۆەستيتسيا تارتۋ جۇمىستارى جالعاسىپ جاتىر. قالا اكىمىنىڭ ايتۋىنشا, جىل سوڭىنا دەيىن قۇنى 450 ميلليارد تەڭگەدەن استام قاراجاتقا 33 جاڭا ينۆەستيتسيالىق جوبا ىسكە اسىرىلادى. بيىل جالپى ينۆەستيتسيا كولەمى 2,2 تريلليون تەڭگەگە جەتىپ, وتكەن جىلمەن سالىستىرعاندا 10 پايىزعا ارتادى.

الماتى اكىمى مەملەكەت باسشىسىنىڭ باستاماسىمەن قولعا الىنعان, قورشاعان ورتاعا ۇقىپتى قاراۋ مادەنيەتىن قالىپتاستىراتىن «تازا قازاقستان» باعدارلاماسىنىڭ ورىندالۋى جايىندا مالىمەت بەردى. اۋلالار, كوشە-جول جەلىلەرى مەن جاسىل ايماقتاردى كەشەندى تۇردە كۇتىپ, باپتاۋ ءۇشىن ءۇش جىلدىق كەلىسىمشارت ءتاسىلى ەنگىزىلدى.

پرەزيدەنت بۇعان دەيىن شاھاردىڭ ەكولوگيالىق جاعدايىن جاقسارتۋ, جىل سوڭىنا دەيىن قالاداعى قوعامدىق كولىكتەردى ەكولوگيالىق تالاپقا تولىق ساي ەتۋ, سونداي-اق الماتىنىڭ كولىك قۇرىلىمىن قالىپتاستىرۋ بويىنشا تاپسىرما بەرگەن بولاتىن. كەزدەسۋدە وسى جۇمىستاردىڭ ناتيجەلەرى باياندالدى.

قاسىم-جومارت توقاەۆ ەربولات دوساەۆقا ەكولوگيا ماسەلەسىنە دەن قويىپ, ينجەنەرلىك جانە الەۋمەتتىك ينفراقۇرىلىمدى جاڭعىرتۋ, جىل سوڭىنا دەيىن ساپالى سىرتقى جارىقتاندىرۋمەن قامتاماسىز ەتۋ مىندەتىن جۇكتەدى. سونداي-اق الماتىنىڭ ورنىقتى دامۋىنا قاتىستى بەرگەن تاپسىرمالارىن مۇقيات ورىنداۋ قاجەت ەكەنىن ايتتى.