پرەزيدەنت ينۆەستور تارتۋعا اتسالىسپاعان اكىمدەر مەن مينيسترلەردى سىنعا الدى

فوتو: اقوردا

پرەزيدەنت جولداۋدا ەكونوميكاعا سالىنعان تىكەلەي ينۆەستيتسيا كولەمىن ازايتىپ الماۋ ءۇشىن وسى باعىتتاعى جۇمىستى كۇشەيتۋ كەرەگىن ەسكەرتتى. بۇل تۋرالى qandastar.kz اقپارات اگەنتتىگى حابارلايدى.

مەملەكەت باسشىسى كەيبىر اكىمدەر مەن مينيسترلەر ينۆەستور تارتۋ ىسىنە ءجوندى اتسالىسپاي وتىر دەپ اتاپ ءوتتى.

“ينۆەستيتسيالىق احۋالدى جانە بيزنەس جۇرگىزۋگە قاجەت جاعدايدى جاقسارتۋ جولىندا ۇزدىكسىز جۇمىس ىستەۋ ماڭىزدى. دۇنيەجۇزىندە ينۆەستيتسياعا تالاس ءورشىپ تۇرعان كەزدە ەلگە قارجى تارتۋ ءۇشىن ء«دال وسى جەردە جانە ءدال قازىر» قاعيداسى بويىنشا شەشىم قابىلداۋ – ەڭ قاجەت شارا. سوندىقتان ۇكىمەت جانىنداعى ينۆەستيتسيا شتابىنا اۋقىمدى قۇزىرەت بەرىلدى. بۇل قادام مەتالدى تەرەڭ وڭدەۋ, مۇناي-گاز-كومىر حيمياسى, تۋريزم, ەنەرگەتيكا جانە ماشينا جاساۋ سياقتى ماڭىزدى سالالارداعى جوبالاردى جۇزەگە اسىرۋ قارقىنىن ارتتىرۋعا جول اشتى. ەكونوميكاعا سالىنعان تىكەلەي ينۆەستيتسيا كولەمىن ازايتىپ الماۋ ءۇشىن وسى باعىتتاعى جۇمىستى كۇشەيتۋ كەرەك. كەيبىر اكىمدەر مەن مينيسترلەر ينۆەستور تارتۋ ىسىنە ءجوندى اتسالىسپاي وتىرعانىن اتاپ وتكىم كەلەدى. ۇكىمەت بۇل شارۋانى رەتكە كەلتىرۋگە ءتيىس”, – دەيدى توقاەۆ.

پرەزيدەنت اۋقىمدى جوبالاردىڭ ءتىزىمىن جاساۋدى تاپسىردى.

“اسىرەسە, حالىقارالىق قارجى ينستيتۋتتارى قاتىساتىن جوبالارعا باسا نازار اۋدارۋ كەرەك. ۇكىمەتكە حالىقارالىق قارجى ۇيىمدارى مەملەكەتتىك-جەكەمەنشىك ارىپتەستىك تاسىلىمەن قارجىلاندىرىپ, تولىق جۇزەگە اسىراتىن اۋقىمدى جوبالاردىڭ ءتىزىمىن جاساۋدى تاپسىرامىن. مەن بيىل مامىر ايىندا «ەكونوميكانى ىرىقتاندىرۋ شارالارى تۋرالى» جارلىققا قول قويدىم. بۇل قۇجاتتا كورسەتىلگەن تالاپتار مۇلتىكسىز ورىندالۋعا ءتيىس», – دەدى مەملەكەت باسشىسى.