پرەزيدەنت يتاليا مينيسترلەر كەڭەسىنىڭ توراعاسىمەن كەڭەيتىلگەن قۇرامدا كەلىسسوز جۇرگىزدى

قاسىم-جومارت توقاەۆ قازاقستانعا رەسمي ساپارمەن كەلگەن دجوردجا مەلونيمەن كەڭەيتىلگەن قۇرامدا كەلىسسوز جۇرگىزدى. جيىنعا ەكى ەل دەلەگاتسيالارى قاتىستى. 

مەملەكەت باسشىسى قازاقستان مەن يتاليا ستراتەگيالىق سەرىكتەس ەكەنىن اتاپ ءوتتى. قوس ەلدىڭ قارىم-قاتىناسى ءوزارا قۇرمەتكە, سەنىم مەن ورتاق مۇددەگە نەگىزدەلگەن.

پرەزيدەنت مەملەكەتتەر اراسىندا تىعىز ساياسي ديالوگ ورناپ, بەرىك ەكونوميكالىق ىنتىماقتاستىق دامىپ كەلە جاتقانىن جەتكىزدى. سونىمەن قاتار مادەني-گۋمانيتارلىق بايلانىس بەكي تۇسكەنىنە نازار اۋداردى.

قاسىم-جومارت توقاەۆ قازاقستان يتاليانىڭ ورتالىق ازياداعى جەتەكشى سەرىكتەسى, ال يتاليا ەلىمىزدىڭ ساۋدا ارىپتەستەرىنىڭ ۇشتىگىنە ەنەتىن جانە ءىرى ينۆەستورلارىنىڭ ءبىرى ەكەنىن ايتتى. ەلدەر اراسىنداعى تاۋار اينالىمى 24 پايىزعا ارتىپ, وتكەن جىلى 20 ميلليارد دوللارعا جەتتى.

– ءسىزدىڭ باسشىلىعىڭىزبەن يتاليا ۇكىمەتىنىڭ قازاقستانمەن اراداعى تىعىز قارىم-قاتىناستاردى ساۋدا جانە ينۆەستيتسيا سالالارىندا عانا ەمەس, پارلامەنتارالىق ىقپالداستىق باعىتىندا دامىتۋعا ۇمتىلىسىن جوعارى باعالايمىز. سونداي-اق ەكىجاقتى گۋمانيتارلىق ىقپالداستىققا دا شىنايى ريزاشىلىعىمىزدى بىلدىرەمىز. ءسىزدىڭ بۇل ساپارىڭىزدىڭ ەكى ەل اراسىنداعى ىنتىماقتاستىققا تىڭ سەرپىن بەرۋ تۇرعىسىنان ماڭىزى زور. حالىقارالىق ارەنادا قازاقستان مەن يتاليانىڭ بايلانىستارى سەنىمدى ءارى ستراتەگيالىق سەرىكتەس سيپاتىندا جالعاسا بەرەدى دەپ سەنەمىن, – دەدى مەملەكەت باسشىسى.

پرەزيدەنت سوڭعى جيىرما جىلدا يتاليا قازاقستان ەكونوميكاسىنا 7,6 ميلليارد دوللارعا دەيىن ينۆەستيتسيا قۇيعانىن اتاپ ءوتتى. سونداي-اق قازاقستاندا ENI, SDF Group, PetroValves, Maire Tecnimont جانە Ballestra سەكىلدى ءىرى ينۆەستورلار باستاعان 270-كە جۋىق يتاليالىق كومپانيا تابىستى جۇمىس ىستەپ جاتقانىن جەتكىزدى.

دجوردجا مەلوني ەكى ەل اراسىنداعى ىقپالداستىقتى جوعارى باعالاپ, ونىڭ ستراتەگيالىق سەرىكتەستىك رۋحىنا ساي كەلەتىنىن ايتتى

– ءسىزدى كورەگەن كوشباسشىلاردىڭ ءبىرى سانايمىن. قازىرگى سىن-قاتەرلەردى تەرەڭ تۇسىنەتىن اداممەن اڭگىمەلەسۋ مەن ءۇشىن وتە قۇندى. وسىناۋ قيىن كەزەڭدە جاقسى جاڭالىقتار دا بار. سونىڭ ءبىرى – يتاليا مەن قازاقستان اراسىنداعى قارىم-قاتىناس. ءبىزدىڭ بايلانىستارىمىزدىڭ دەڭگەيى جوعارى. مۇنى بۇعان دەيىن بىرنەشە رەت اتاپ وتتىك. دەگەنمەن ىنتىماقتاستىقتى ودان ءارى نىعايتۋعا مۇمكىندىك جەتكىلىكتى. مەنىڭ ساپارىمنىڭ ماقساتى دا وسى. ءسىزدىڭ ەلىڭىزدىڭ باتىس پەن شىعىستى بايلانىستىرىپ جاتقان التىن كوپىر رەتىندەگى تاريحي ءمانىن جاقسى بىلەمىز, – دەدى يتاليا پرەمەر-ءمينيسترى.

كەلىسسوز بارىسىندا ەكىجاقتى كۇن ءتارتىبىنىڭ نەگىزگى باعىتتارىن قامتيتىن كوپتەگەن ماسەلە تالقىلاندى.

قاسىم-جومارت توقاەۆ پەن دجوردجا مەلوني قازاقستان مەن يتاليانىڭ قارىم-قاتىناسىن قارقىندى دامىتۋعا ىقپال ەتەتىن سەرىكتەستىكتى ودان ءار جانداندىرىپ, جاڭا باستامالاردى جۇزەگە اسىرۋعا مۇددەلى ەكەندەرىن راستادى.