جاڭالىقتار
پرەزيدەنت قاسىم-جومارت توقاەۆ Orbis Kazakhstan كومپانيالار توبىنىڭ نەگىزىن قالاۋشى فاررۋح ماحمۋدوۆتى قابىلدادى
فاررۋح ماحمۋدوۆ:
Orbis Kazakhstan كومپانياسى جۇمىسىنىڭ ناتيجەلەرى مەن دامۋ پەرسپەكتيۆالارى جونىندە مالىمەت بەردى:
– الماتى يندۋستريالىق پاركىندە تولىق تسيكلدى اۆتوموبيل زاۋىتىن سالۋ جوسپارى جايىندا باياندادى. جوبا اياسىندا قحر-دىڭ Exeed جانە Kaiyi سەكىلدى برەندتەرى ءبىر ءوندىرىس الاڭىندا بىرىگەدى. قىتايلىق سەرىكتەستەرمەن كولىكتى ۇساق بولشەكتەردەن قۇراستىرۋ تۋرالى تولىققاندى كەلىسىم جاسالعان. بۇل جوباعا سالىنعان ينۆەستيتسيانىڭ جالپى كولەمى – 72 ميلليارد تەڭگە. باستاپقى كەزەڭدە 1500 جاڭا جۇمىس ورنى اشىلادى. زاۋىتتىڭ وندىرىستىك قۋاتى جىلىنا 80 مىڭ اۆتوموبيل شىعارۋعا جەتەدى. ءونىم ىشكى جانە سىرتقى نارىقتا ساتىلادى, سونىڭ ىشىندە ورتالىق ازيا مەن كاۆكاز ايماعى ەلدەرىنە ەكسپورتتالادى;
كومپانيانىڭ استانا قالاسىنداعى ينفراقۇرىلىمداردى دامىتۋ ىسىنە قاتىسۋى جونىندە مالىمەت بەردى:
– بيىل كاسىپورىن ساۋدا-بازار كەشەنىن سالىپ ءبىتىرۋدى جانە كوپبەيىندى مەديتسينالىق كلينيكا قۇرىلىسىن باستاۋدى, سونداي-اق Agro Park كوتەرمە ساۋدا جانە تاۋار تاراتۋ ورتالىعىنىڭ قۇرىلىسىنا كىرىسۋدى جوسپارلاپ وتىر;
كومپانيالار توبى الماتىنىڭ تۋريزم كلاستەرىن دامىتۋعا قاتىستى بىرقاتار جوبانى جۇزەگە اسىرىپ جاتقانى تۋرالى ايتتى:
– وڭتۇستىك استانانىڭ سيمۆولى ءارى تاريحي عيماراتى سانالاتىن Almaty قوناق ۇيىنە رەكونسترۋكتسيا جاساۋ جۇمىستارى باستالعان. «پروسۆەششەنەتس» رەكرەاتسيالىق ورتالىعى مەن قوناەۆ قالاسىنداعى كوپفۋنكتسيونالدى دەمالىس ورتالىعىنىڭ قۇرىلىسى جۇرگىزىلۋدە;
كومپانيانىڭ باتىس قازاقستان وبلىسىنداعى اقسۋ جانە كەڭتۇبەك ەلدى مەكەندەرىندە سۋ تاسقىنى سالدارىن جويۋعا ۇلەس قوسقانى جونىندە باياندادى. فاررۋح ماحمۋدوۆ وتاندىق بيزنەسكە ۇدايى قولداۋ كورسەتەتىنى ءۇشىن پرەزيدەنتكە العىس ايتتى.
قاسىم-جومارت توقاەۆ كومپانيانىڭ باستامالارىن وڭ باعالاپ, جاڭا جوبالاردى جۇزەگە اسىرۋ ىسىنە تابىس تىلەدى.
