جاڭالىقتار
پرەزيدەنت قازاقستان حالقى اسسامبلەياسىنىڭ XXXIV سەسسياسىنىڭ پلەنارلىق وتىرىسىن
قازاقستان پرەزيدەنتى قاسىم-جومارت توقاەۆ قازاقستان حالقى اسسامبلەياسىنىڭ XXXIV سەسسياسىنىڭ پلەنارلىق وتىرىسىندا ەلىمىزدەگى ءسوز بوستاندىعى, ەتنوسارالىق كەلىسىم جانە كەيبىر شەتەلدىك ۇيىمداردىڭ ارەكەتتەرىنە قاتىستى پىكىر ءبىلدىردى, دەپ حابارلايدى qandastar.kz
مەملەكەت باسشىسى قوعامداعى سىن مەن پىكىر ءبىلدىرۋ مادەنيەتىنە نازار اۋداردى.
«كۇرىش پەن كۇرمەكتى, كونسترۋكتيۆتى سىن مەن دالەلسىز ءمىن تاعۋدى, كوڭىلگە تيمەيتىن پاروديا مەن جيىركەنىشتى قورلاۋدى ايىرا ءبىلۋ ماڭىزدى. زاڭ الدىندا ءبارى تەڭ. سول سەبەپتى ءبىز ەلىمىزدەگى ەتنوسارالىق كەلىسىم مەن بەيبىتشىلىككە نۇقسان كەلتىرەتىن كەز كەلگەن ارانداتۋدىڭ جولىن كەسىپ كەلەمىز, ءارى قاراي دا قاتاڭ توسقاۋىل قويامىز», – دەدى پرەزيدەنت.
توقاەۆ كەيبىر ءوزىن قۇقىق قورعاۋشى, بلوگەر نەمەسە جۋرناليست رەتىندە كورسەتەتىن تۇلعالاردىڭ ارەكەتتەرىنە توقتالىپ, ولاردىڭ شىنايى ماقساتى حالىقتى اداستىرۋ ەكەنىن ايتتى.
«وزدەرىن ءسوز ەركىندىگىنىڭ جاقتاۋشىسى رەتىندە كورسەتكىسى كەلەتىن كەيبىر قۇقىق قورعاۋ ۇيىمدارىنىڭ وكىلدەرى, بلوگەرلەر مەن جۋرناليستەر ەلىمىزدەگى ءار ىستەن ساياسي, جاعىمسىز استار ىزدەپ, شىن مانىندە, ارانداتۋمەن اينالىسىپ ءجۇر. بۇل – قازاقستاننان كوشىپ كەتىپ, شەتەلدە ءجۇرىپ حالقىمىزعا شابۋىل جاسايتىن, ءتىپتى مەملەكەتتىك ورگانداردى بوپسالايتىن بۇرىنعى ازاماتتارىمىزدىڭ ارەكەتى. ولار شەت مەملەكەتتەر بەرگەن اقشانى اقتاۋعا جۇمىس ىستەپ ءجۇر», – دەدى ول.
پرەزيدەنت بۇل ارەكەتتەردى ەلىمىزدىڭ ۇلتتىق قاۋىپسىزدىگىنە تونەتىن قاتەر رەتىندە باعالاپ, سىرتقى كۇشتەردىڭ دەموكراتيا ۇعىمىن ءوز مۇددەسىنە پايدالانۋعا تىرىسىپ جاتقانىن اشىق ايتتى.
«دەموكراتيانى بىرەۋدىڭ قارجىسىمەن ورناتۋعا بولمايدى. ەلىمىزدىڭ ءال-اۋقاتى, سونىڭ ىشىندە دەموكراتيا مەن ءسوز بوستاندىعى ءۇشىن شەتەلدە ەشكىمنىڭ باسى اۋىرىپ, بالتىرى سىزدامايدى. ونى ناقتى تۇسىنگەن ءجون», – دەپ اتاپ ءوتتى قاسىم-جومارت توقاەۆ.
مەملەكەت باسشىسى جاقىندا شەتەلدىك ۇكىمەتتىك ەمەس ۇيىمداردىڭ كۇماندى ارەكەتتەرى اشىق اشكەرەلەنگەنىن ايتتى. سونداي-اق, كەيبىر وتاندىق گرانت الۋشىلاردىڭ دا كولەڭكەلى ىستەرى بەلگىلى بولعانىن اتاپ ءوتتى.
«قازاقستاندا پروبلەما جوق دەمەيمىز. ارينە, باسقا ەلدەردەگىدەي بىزدە دە تۇيتكىلدەر بار. بىراق ءبىز ونى الدەكىمدەردىڭ ادىستەمەسىمەن ەمەس, ءوزىمىزدىڭ ۇلتتىق مۇددەمىز بەن زاڭناما اياسىندا شەشەمىز», – دەدى پرەزيدەنت.
مەملەكەت باسشىسى قازاقستان حالقىنىڭ بەرەكە-بىرلىگى مەن ۇلتتىق قۇندىلىقتارعا ادالدىعىن باسا ايتىپ, ەل تۇتاستىعىن ساقتاۋداعى باستى تىرەك – تاريحي-مادەني ساباقتاستىق ەكەنىن جەتكىزدى.
«يدەولوگيالىق وشپەندىلىك – ءبىزدىڭ دۇنيەتانىمىمىزعا مۇلدە جات. ءداستۇرىمىز بەن قۇندىلىقتارىمىز, بولمىسىمىز بەن ءومىر سالتىمىز ۇلتىمىزدى ءبىرتۇتاس تاريحي-مادەني جانە ساياسي قاۋىم رەتىندە بىرىكتىرىپ, تۇتاستىعىن بەكەمدەيدى», – دەدى توقاەۆ.
