پرەزيدەنت قازاقستان حالقىن رامازان ايىنىڭ باستالۋىمەن جانە العىس ايتۋ كۇنىمەن قۇتتىقتادى

مەملەكەت باسشىسى قاسىم-جومارت توقاەۆ قازاقستان حالقىن قاسيەتتى رامازان ايىنىڭ باستالۋىمەن جانە العىس ايتۋ كۇنىمەن قۇتتىقتادى, دەپ حابارلايدى qandastar.kz

«قۇرمەتتى وتانداستار! بارشاڭىزدى قاسيەتتى رامازان ايىنىڭ باستالۋىمەن قۇتتىقتايمىن! بۇل – حالقىمىزدىڭ رۋحاني ومىرىندە ايرىقشا ماڭىزى بار كەزەڭ. ورازا كەزىندە سابىرلىلىق پەن قاناعاتشىلدىق, جاناشىرلىق پەن قامقورلىق سەكىلدى ىزگى قۇندىلىقتار ەرەكشە دارىپتەلەدى. ازاماتتارىمىز مۇقتاج جاندارعا كومەك بەرىپ, قايىرىمدىلىق جاساۋعا ۇمتىلادى. مۇنىڭ ءبارى يسلام ءدىنىنىڭ گۋمانيستىك يدەيالارىنان باستاۋ الادى. حالقىمىز ءۇشىن ءدىن مەن ءداستۇر – ءبىرىن-ءبىرى تولىقتىرىپ, ءوزارا ساباقتاسىپ جاتقان ەگىز ۇعىم. اسىل ءدىنىمىز دە, اتا ءداستۇرىمىز دە جۇرتتى جاقسىلىق پەن جاسامپازدىققا ۇندەيدى. بيىل رامازان ايى العىس ايتۋ كۇنىمەن تۇسپا-تۇس كەلىپ وتىر. مۇنىڭ زور سيمۆولدىق ءمانى بار. مازمۇنى تەرەڭ, ماعىناسى ۇندەس قوس مەرەكە حالقىمىزدىڭ بەرەكەلى بىرلىگىن ودان ءارى نىعايتا تۇسۋگە شاقىرادى. ورازادان ورازاعا امان-ەسەن جەتە بەرەيىك!   بارشاڭىزعا باق-بەرەكە تىلەيمىن! نيەت قابىل بولسىن!», — دەلىنگەن قۇتتىقتاۋ حابارلاماسىندا.

سونىمەن قاتار, مەملەكەت باسشىسى قاسىم-جومارت توقاەۆتىڭ العىس ايتۋ كۇنىمەن قۇتتىقتادى.

«قۇرمەتتى وتانداستار! بارشاڭىزدى العىس ايتۋ كۇنىمەن شىن جۇرەكتەن قۇتتىقتايمىن! بۇل جارقىن مەرەكە ازاماتتارىمىزدىڭ ءبىر-بىرىنە دەگەن ريزاشىلىعى مەن تىلەكتەستىگىنىڭ, شىنايى قۇرمەتىنىڭ سيمۆولى سانالادى. حالقىمىز عاسىرلار بويى بەرەكەلى بىرلىگى مەن تۋعان جەرگە دەگەن شەكسىز سۇيىسپەنشىلىگىنىڭ ارقاسىندا ەڭ كۇردەلى سىناقتار مەن قاتەرلەردى ەڭسەرە ءبىلدى. وسى ىرگەلى قۇندىلىقتار جالپىۇلتتىق بىرەگەيلىگىمىزدىڭ اجىراماس بولىگىنە اينالدى. بيىل قازاقستان حالقى اسسامبلەياسىنىڭ قۇرىلعانىنا 30 جىل تولادى. بۇل قۇرىلىم قوعامداعى ءوزارا تۇسىنىستىك پەن كەلىسىمدى نىعايتۋعا ولشەۋسىز ۇلەس قوسىپ كەلەدى. قازىر ءبىزدىڭ الدىمىزدا جۇيەلى ءارى اۋقىمدى رەفورمالاردى جۇزەگە اسىرۋ مىندەتى تۇر. وسى ورايدا, ءار ازاماتتىڭ ەل تاعدىرىنا جاۋاپتى ەكەنىن تولىق سەزىنە ءبىلۋى ماڭىزدى. ءبىز جۇدىرىقتاي جۇمىلا بىلسەك قانا, ۇيلەسىمدى جانە ادىلەتتى قوعام قۇرۋ جولىندا جەتىستىككە جەتەمىز. تۋعان ەلدىڭ يگىلىگى ءۇشىن ادال ءارى تىنىمسىز ەڭبەك ەتىپ جۇرگەن بارشا وتانداستارىما العىس ايتامىن. سىزدەرگە زور دەنساۋلىق, باق-بەرەكە تىلەيمىن!», — دەلىنگەن پرزيدەنت قۇتتىقتاۋىندا.