Prezıdent Qazaqstan halqyn Ramazan aıynyń bastalýymen jáne Alǵys aıtý kúnimen quttyqtady

Memleket basshysy Qasym-Jomart Toqaev Qazaqstan halqyn qasıetti Ramazan aıynyń bastalýymen jáne Alǵys aıtý kúnimen quttyqtady, dep habarlaıdy qandastar.kz

«Qurmetti otandastar! Barshańyzdy qasıetti Ramazan aıynyń bastalýymen quttyqtaımyn! Bul – halqymyzdyń rýhanı ómirinde aıryqsha mańyzy bar kezeń. Oraza kezinde sabyrlylyq pen qanaǵatshyldyq, janashyrlyq pen qamqorlyq sekildi izgi qundylyqtar erekshe dáripteledi. Azamattarymyz muqtaj jandarǵa kómek berip, qaıyrymdylyq jasaýǵa umtylady. Munyń bári ıslam dininiń gýmanıstik ıdeıalarynan bastaý alady. Halqymyz úshin din men dástúr – birin-biri tolyqtyryp, ózara sabaqtasyp jatqan egiz uǵym. Asyl dinimiz de, ata dástúrimiz de jurtty jaqsylyq pen jasampazdyqqa úndeıdi. Bıyl Ramazan aıy Alǵys aıtý kúnimen tuspa-tus kelip otyr. Munyń zor sımvoldyq máni bar. Mazmuny tereń, maǵynasy úndes qos mereke halqymyzdyń berekeli birligin odan ári nyǵaıta túsýge shaqyrady. Orazadan orazaǵa aman-esen jete bereıik!   Barshańyzǵa baq-bereke tileımin! Nıet qabyl bolsyn!», — delingen quttyqtaý habarlamasynda.

Sonymen qatar, Memleket basshysy Qasym-Jomart Toqaevtyń Alǵys aıtý kúnimen quttyqtady.

«Qurmetti otandastar! Barshańyzdy Alǵys aıtý kúnimen shyn júrekten quttyqtaımyn! Bul jarqyn mereke azamattarymyzdyń bir-birine degen rızashylyǵy men tilektestiginiń, shynaıy qurmetiniń sımvoly sanalady. Halqymyz ǵasyrlar boıy berekeli birligi men týǵan jerge degen sheksiz súıispenshiliginiń arqasynda eń kúrdeli synaqtar men qaterlerdi eńsere bildi. Osy irgeli qundylyqtar jalpyulttyq biregeıligimizdiń ajyramas bóligine aınaldy. Bıyl Qazaqstan halqy Assambleıasynyń qurylǵanyna 30 jyl tolady. Bul qurylym qoǵamdaǵy ózara túsinistik pen kelisimdi nyǵaıtýǵa ólsheýsiz úles qosyp keledi. Qazir bizdiń aldymyzda júıeli ári aýqymdy reformalardy júzege asyrý mindeti tur. Osy oraıda, ár azamattyń el taǵdyryna jaýapty ekenin tolyq sezine bilýi mańyzdy. Biz judyryqtaı jumyla bilsek qana, úılesimdi jáne ádiletti qoǵam qurý jolynda jetistikke jetemiz. Týǵan eldiń ıgiligi úshin adal ári tynymsyz eńbek etip júrgen barsha otandastaryma alǵys aıtamyn. Sizderge zor densaýlyq, baq-bereke tileımin!», — delingen Przıdent quttyqtaýynda.