پرەزيدەنت قازاقستاندىقتاردى جەڭىس كۇنىمەن قۇتتىقتادى

فوتو: اقوردا

مەملەكەت باسشىسى قاسىم-جومارت توقاەۆ قازاقستاندىقتاردى جەڭىس كۇنىمەن قۇتتىقتادى, دەپ جازدى qandastar.kz.

توقاەۆ ۇلى جەڭىستىڭ 80 جىلدىعىنا وراي وتانداستارىنا تىلەگىن جاۋدىردى. سوزىنشە, وسى مەرەيلى كۇندى ەلىمىزدىڭ ءاربىر ازاماتى ەرەكشە كوڭىل-كۇيمەن قارسى الىپ, جەڭىمپاز اعا بۋىنعا شەكسىز ريزاشىلىعىن بىلدىرەدى.  

“فاشيزمگە قارسى سۇراپىل سوعىس حالقىمىزعا وراسان زور قايعى-قاسىرەت اكەلدى. ءبىزدىڭ قاھارمان جاۋىنگەرلەرىمىز اسقان ەرلىك پەن باتىلدىق تانىتىپ, ازاتتىق پەن ادىلدىك جولىندا ايانباي كۇرەستى. ءجۇز مىڭداعان ساربازىمىز ۇرىس دالاسىندا قازا تاپتى. تىلداعى جۇرت تا ادام ايتقىسىز قيىندىققا قاراماستان تىنىمسىز تەر توگىپ, جەڭىستى جاقىنداتۋعا ولشەۋسىز ۇلەس قوستى. ولار ەگىس القابىندا, زاۋىتتار مەن فابريكالاردا كۇن-ءتۇن دەمەي جۇمىس ىستەپ, مايداندى قامتاماسىز ەتتى”, – دەدى توقاەۆ.

ول باتىرلاردىڭ قايتپاس قايسارلىعى مەن قاجىرلى ەڭبەگى ۇمىت بولمايدى دەدى.

“جانقيارلىق پەن ەرلىكتىڭ وزىق ۇلگىسىن كورسەتكەن باتىرلارىمىزدىڭ ەسىمىن ءاردايىم ۇلىقتايمىز. ارداگەرلەرىمىزگە قامقورلىق جاساپ, قولداۋ بىلدىرەمىز”, – دەدى ول.

قازاقستاندا جەڭىس كۇنىنە وراي بەس جۇزگە جۋىق كوشەنى قاھارمان ەرلەرىمىزدىڭ اتىمەن اتاۋ تۋرالى شەشىم قابىلدانعان ەكەن. سونداي-اق اۋقىمدى اسكەري شەرۋ وتكەنىن اتاپ ءوتتى. مۇنىڭ ءبارى زۇلمات سوعىستىڭ زاردابىن حالقىمىز ەشقاشان جادىنان شىعارماۋى ءۇشىن قاجەت ەكەنىن ايتتى.

ء“بىز جەڭىس كۇنىندە بەيبىت ءومىردىڭ قادىرىن ۇعىنىپ, دوستىق پەن تىنىشتىقتىڭ ماڭىزدىلىعىن تەرەڭ تۇسىنەمىز. وسى مىزعىماس قۇندىلىقتار ءاردايىم حالقىمىزدىڭ ءال-اۋقاتىن ارتتىرۋدىڭ جانە قازاقستاندى تۇراقتى دامىتۋدىڭ بەرىك نەگىزى بولىپ قالا بەرەدى. مەن بۇعان كامىل سەنەمىن. قادىرلى ارداگەرلەرىمىزگە جانە بارشا وتانداستارىمىزعا زور دەنساۋلىق, باق-بەرەكە تىلەيمىن!”, – دەدى پرەزيدەنت.