جاڭالىقتار
پرەزيدەنت «قازپوشتانىڭ» باسشىسى اسەل جاناسوۆانى قابىلدادى
فوتو: اقوردا
مەملەكەت باسشىسى قاسىم-جومارت توقاەۆ «قازپوشتا» اق باسقارما توراعاسى اسەل جاناسوۆانى قابىلدادى, – دەپ حابارلايدى qandastar.kz اقورداعا سىلتەمە جاساپ.
اسەل جاناسوۆا پرەزيدەنتكە كومپانيانىڭ بىلتىر اتقارعان قىزمەتىنىڭ ناتيجەلەرى, قارجىلىق جاعدايى, سونداي-اق دامۋدىڭ پەرسپەكتيۆتى باعىتتارى تۋرالى ەسەپ بەردى.
سوڭعى ەكى جىلدا «قازپوشتا» تازا تابىس تاۋىپ, بيۋدجەتكە 45 ميلليارد تەڭگە كولەمىندە سالىق جانە باج الىمدارىن تولەگەن.
كومپانيا دۇنيەجۇزىلىك پوشتا وداعىنىڭ رەيتينگىسى بويىنشا العاش رەت ەڭ ۇزدىك 50 پوشتا وپەراتورىنىڭ قاتارىنا كىرگەنى جونىندە باياندادى. تاسىمال ۇدەرىسىن وڭتايلاندىرۋ ەسەبىنەن پوشتالىق جونەلتىلىمدەردىڭ كولەمى 26 پايىزعا وسكەن. اتاپ ايتقاندا, 20 ميلليون, سونىڭ ىشىندە 9 ميلليون حالىقارالىق سالەمدەمە جەتكىزىلگەن.
HomePost جوباسىنىڭ جۇزەگە اسىرىلۋ بارىسىن تانىستىردى. اتالعان باستاما اياسىندا ءۇي جانىنداعى دۇكەندەر اۋماعىندا تاپسىرىستاردى بەرۋگە ارنالعان 180 پۋنكت اشىلعان. بيىل ولاردىڭ سانى 1 مىڭعا جەتەدى. YTO Express كومپانياسىمەن ىنتىماقتاستىق شەڭبەرىندە پوشتالىق ينفراقۇرىلىمدى جاڭعىرتۋعا 50 ميلليون دوللار كولەمىندە ينۆەستيتسيا تارتىلعان.
سونىمەن قاتار قىزمەت ساپاسىن جاقسارتۋ ماقساتىندا ەنگىزىلەتىن يننوۆاتسيا جايىندا ايتتى:
- Japan Post, Toshiba جانە Cainiao كومپانيالارىمەن كولىك جانە لوگيستيكا سالالارىندا بىرلەسكەن جوبالار جۇزەگە اسىرىلىپ جاتىر;
- حالىقارالىق ماركەتپلەيستەرگە قولجەتىمدىلىكتى قامتاماسىز ەتەتىن Keruen سەرۆيسى دامىپ كەلەدى;
- اقتوبە اۋەجايىندا مۋلتيمودالدى قويما سالۋ جوسپارلانىپ وتىرعانى جونىندە ايتتى. اۋماعى 15 مىڭ شارشى مەتر بولاتىن بۇل نىسان تۇركيانىڭ S-Sistem كومپانياسىمەن سەرىكتەستىك نەگىزىندە بوي كوتەرەدى.
مەملەكەت باسشىسى كومپانيانىڭ قارجىلىق جاعدايىن جاقسارتۋ, ەلىمىزدىڭ تمد-عا باعىتتالعان كولىك-لوگيستيكا الەۋەتىن ەلەكتروندى ساۋدا سالاسىندا دامىتۋ جانە تسيفرلىق شەشىمدەر ەنگىزۋ بويىنشا جۇمىستاردى جالعاستىرۋدى تاپسىردى.
