جاڭالىقتار
پرەزيدەنت قورعانىس مينيسترىنە ناقتى تاپسىرمالار بەردى
فوتو: اقوردا
رۋسلان جاقسىلىقوۆ قورعانىس ۆەدومستۆوسىنىڭ بيىلعى اتقارعان قىزمەتى تۋرالى ەسەپ بەردى, دەپ جازادى qandastar.kz
قورعانىس ءمينيسترى:
- بولىمشەلەردىڭ جاۋىنگەرلىك دايىندىعى مەن قارۋلى كۇشتەر قاتارىنا كۇزگى شاقىرۋ ناۋقانىنىڭ ناتيجەلەرى, سونداي-اق اسكەري قىزمەتتەگى ءتارتىپ پەن قاۋىپسىزدىكتى نىعايتۋعا, اسكەري قىزمەتشىلەردىڭ الەۋمەتتىك مارتەبەسى مەن جالاقىسىن ارتتىرۋعا باعىتتالعان شارالار جونىندە باياندادى;
- ارميانىڭ جاۋىنگەرلىك الەۋەتىن كەزەڭ-كەزەڭىمەن كوتەرۋ جانە اسكەردى دايارلاۋدىڭ جاڭا تاسىلدەرىنە كوشۋ ماسەلەلەرىنە ايرىقشا نازار اۋدارىلعانىن ايتتى;
- مەملەكەتتىك قورعانىس تاپسىرىسىنىڭ ورىندالۋ بارىسىن جەتكىزىپ, اسكەردىڭ قارۋ-جاراق پەن تەحنيكانىڭ جاڭا ۇلگىلەرىمەن, اتاپ ايتقاندا, ۇشقىشسىز باسقارىلاتىن اۆياتسيالىق جۇيەلەرىمەن, راديوەلەكتروندىق كۇرەس كەشەندەرىمەن جاراقتاندىرىلىپ جاتقانىن حاباردار ەتتى.
قاسىم-جومارت توقاەۆ ەلىمىزدىڭ بىتىمگەرلىك كونتينگەنتىنىڭ بۇۇ اياسىندا گولان جوتالارىندا اتقارىپ جاتقان قىزمەتى ماڭىزدى ەكەنىن اتاپ ءوتتى.
كەزدەسۋ سوڭىندا پرەزيدەنت – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆ مينيسترگە وتاندىق قورعانىس كاسىپورىندارىمەن ءوزارا ىقپالداستىقتى جانداندىرۋ, اۋماقتىق قورعانىس پەن ارنايى وپەراتسيا كۇشتەرىن دامىتۋ, الەۋمەتتىك-قۇقىقتىق جۇمىستى كۇشەيتۋ جونىندە ناقتى مىندەتتەر جۇكتەدى.
