جاڭالىقتار
پرەزيدەنت قىتاي دەلەگاتسياسىمەن كەزدەستى
فوتو: اقوردا
قاسىم-جومارت توقاەۆ دۇنيەجۇزىلىك داوشىلار فەدەراتسياسىنىڭ توراعاسى لي گۋانفۋ, قىتاي بۋدداشىلار قاۋىمداستىعى توراعاسىنىڭ ورىنباسارى تسزين بو جانە قحر ءدىن ىستەرى جونىندەگى باس باسقارماسىنىڭ اكىمشىلىك دەپارتامەنتى باستىعىنىڭ ورىنباسارى سۋن ۆەي باستاعان دەلەگاتسيانى قابىلدادى, دەپ حابارلايدى qandastar.kz
پرەزيدەنت جاھاندىق وركەنيەتارالىق ديالوگتى دامىتۋدا قىتايدىڭ سىندارلى ءرول اتقاراتىنىن, سونداي-اق بۇعان توراعا سي تسزينپين زور ۇلەس قوسقانىن اتاپ ءوتتى.
مەملەكەت باسشىسى بەيبىتشىلىك پەن ۇيلەسىم يدەياسىن ىلگەرىلەتۋدە بۋددا جانە داو ىلىمدەرىنىڭ ورنى ەرەكشە ەكەنىن ايتتى. سونىمەن قاتار ەكى ەلدىڭ ءدىن ىسىنە جاۋاپتى مەملەكەتتىك ورگاندارى اراسىنداعى ىنتىماقتاستىقتىڭ ماڭىزىنا توقتالدى.
كەزدەسۋ سوڭىندا قاسىم-جومارت توقاەۆ بىرلەسكەن جۇمىس قازاقستان مەن قىتايدىڭ ماڭگى ستراتەگيالىق سەرىكتەستىگىن نىعايتۋعا, ءوزارا سەنىمدى دامىتۋعا, بەيبىتشىلىك پەن كەلىسىمنىڭ ورتاق قۇندىلىقتارىن دارىپتەۋگە ىقپال ەتەتىنىنە سەنىم ءبىلدىردى.
