پرەزيدەنت قىزمەت بارىسىندا قايتىس بولعان پوليتسەيدى ناگرادتادى

2025 جىلعى 14 قاڭتاردا تاراتىلعان حابارلامادا:

«الماتى وبلىستىق پد پاترۋلدىك پوليتسيا باتالونىنىڭ ينسپەكتورى, قىزمەتتىك مىندەتىن اتقارۋ كەزىندە قايعىلى قازاعا ۇشىراعان پوليتسيا اعا لەيتەنانتى شالحار بايجومارتوۆ 3-دارەجەلى «ايبىن» وردەنىمەن ماراپاتتالدى.

قۇقىق قورعاۋ ورگاندارى وكىلدەرىنىڭ ايتۋىنشا, ماراپاتتى مارقۇمنىڭ اكەسىنە ىشكى ىستەر ءمينيسترىنىڭ ورىنباسارى ايدار سايتبەكوۆ تاپسىرعان.

ەسكە سالايىق, قايعىلى وقيعا 2024 جىلى 20 جەلتوقساندا الماتى-وسكەمەن تاس جولىنىڭ 42-ءشى شاقىرىمىندا بولعان. جول-كولىك وقيعاسىن تىركەۋ كەزىندە كولىكتەردىڭ ءبىرى تىزگىنگە يە بولا الماي, پوليتسيا قىزمەتكەرىن قىزمەتتىك كولىككە قاعىپ, سونىڭ سالدارىنان ول قايتىس بولدى.