جاڭالىقتار
پرەزيدەنت مەملەكەتتىك ساتىپ الۋ تۋرالى جاڭا زاڭعا قول قويدى
فوتو: اشىق دەرەككوز
پرەزيدەنت قاسىم-جومارت توقاەۆ بىرقاتار زاڭعا قول قويدى. بۇل تۋرالى Stan.kz اقپارات اگەنتتىگى حابارلايدى.
اقوردانىڭ مالىمەتىنشە, پرەزيدەنت «مەملەكەتتىك ساتىپ الۋ تۋرالى» زاڭعا قول قويعان. زاڭ پرەزيدەنتتىڭ 2022 جىلعى 1 قىركۇيەكتەگى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىن جۇزەگە اسىرۋ ماقساتىندا قابىلدانعان.
جاڭا زاڭ مەملەكەتتىك ساتىپ الۋ راسىمدەرىن جەڭىلدەتۋگە جانە قىسقارتۋعا باعىتتالعان. جاڭا زاڭ بويىنشا:
— ساتىپ الۋدى جەدەل جۇرگىزۋ, ساتىپ الۋ راسىمدەرىنىڭ كەشىكتىرىلۋىن بولدىرماۋ ماقساتىندا بۇدان بىلاي شاعىمداردى ساتىپ الۋدى ۇيىمداستىرۋشىنىڭ ءوزى تىكەلەي قارايدى;
— ساتىپ الۋ قورىتىندىلارىنا شاعىمدانۋ ۆەب-پورتال ارقىلى جانە جەڭىمپازى تەك كونكۋرستىق كوميسسيا ايقىنداعان ساتىپ الۋلار بويىنشا عانا جۇزەگە اسىرىلادى;
— بۇرىن ساتىپ الۋلار تەك 1 الەۋەتتى ءونىم بەرۋشى قاتىسقان جاعدايدا وتپەدى دەپ تانىلاتىن بولسا, ەندى مۇنداي ءونىم بەرۋشىنى ءتيىستى بىلىكتىلىك تالاپتارىنا ساي دەپ تانىعان جاعدايدا ونىمەن شارت جاساسۋعا رۇقسات بەرىلەدى;
— تاپسىرىس بەرۋشىلەردىڭ تاۋارلاردى, جۇمىستار مەن كورسەتىلەتىن قىزمەتتەردى جەدەل ساتىپ الۋىنا وڭتايلى جاعداي جاساۋ ماقساتىندا ەندى قۇنى 100 اەك-كە دەيىنگى تاۋارلاردى, 500 اەك-كە دەيىنگى جۇمىستار مەن قىزمەتتەردى ءبىر كوزدەن ساتىپ الۋ قۇقىعى قاراستىرىلعان. اۋىل اكىمدىكتەرى ءۇشىن مۇنداي تاۋارلاردى, جۇمىستار مەن كورسەتىلەتىن قىزمەتتەردى ساتىپ الۋ شەگى 3000-نان 4000 اەك-كە دەيىن ۇلعايتىلدى;
— عىلىمي ۇيىمداردىڭ ساتىپ الۋ ءتارتىبى جەڭىلدەتىلدى;
— توتەنشە جاعدايلاردىڭ الدىن الۋعا قاجەتتى تاۋارلاردى, جۇمىستار مەن كورسەتىلەتىن قىزمەتتەردى ءبىر كوزدەن ساتىپ الۋ مۇمكىندىگى بەكىتىلدى;
— مەملەكەتتىك ساتىپ الۋلارعا قوعامدىق باقىلاۋ جۇرگىزۋ مۇمكىندىگى ەنگىزىلدى;
— جالاقى بويىنشا مەرزىمى وتكەن بەرەشەگى بار الەۋەتتى ءونىم بەرۋشىلەر دە مەملەكەتتىك ساتىپ الۋلارعا جىبەرىلمەيدى;
سونداي-اق, پرەزيدەنت «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساتىپ الۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا قول قويعان.
ەسكە سالساق, بۇعان دەيىن پرەزيدەنتتىڭ ماسس-مەديا تۋرالى زاڭعا قول قويعانى تۋرالى جازعان ەدىك.
