Prezıdent Memlekettik tý kóterý rásimine qatysty

Qasym-Jomart Toqaev elordadaǵy «Atameken» etnomemorıaldy kesheninde ótken Memlekettik tý kóterý rásimine qatysty. Qurmet qaraýylynyń bastyǵy saltanatty is-sharaǵa daıyndyǵy týraly Prezıdentke raport berdi. Sodan keıin elimizdiń ánurany shyrqalyp, kók baıraǵymyz kóterildi.

Qasym-Jomart Toqaev jıynǵa qatysýshylardy Memlekettik rámizder kúnimen quttyqtap, bul elimiz úshin mán-mańyzy aıryqsha mereke ekenine toqtaldy.

– Ult rámizderi – Táýelsizdigimizdiń kıeli boıtumary. Eltańba, Tý jáne Ánuran – myzǵymas memlekettigimizdiń belgisi. Qasterli nyshandarymyz Qazaqstannyń egemen el, eńseli jurt ekenin jer júzine áıgileıdi. Baıraǵy bıik eldiń rýhy asqaq bolady. Sondyqtan biz osy meıramǵa oraı jyl saıyn kók Týymyzdy bıikke kóteremiz. Babalarymyz «Týyńdy tik usta!» dep ósıet qaldyrdy. Osy amanatqa adal bolý – barshaǵa ortaq paryz. Búginde kók baıraǵymyz qasterli Otanymyz – Qazaqstannyń beıbit aspanynda jelbirep tur. Ony keıingi urpaqqa tabystaý – qasıetti borysh, – dedi Prezıdent.

Memleket basshysynyń aıtýynsha, qazir kók Týymyzdyń bedelin búkil álem moıyndaıdy. Baıraǵymyz Birikken Ulttar Uıymynyń tórinde tur. Ony alpınısterimiz jer sharyndaǵy eń bıik shyńdarǵa kóterdi. Sportshylarymyz talaı márte jeńis tuǵyryna shyǵardy.

– Bıyl jaýyngerlerimiz bitimgerlik mıssııasyn kók baıraqtyń astynda tuńǵysh ret derbes oryndap keldi. Azamattarymyzdyń, memleketimizdiń osyndaı jetistikteri Qazaqstannyń qýatty ári jasampaz el ekenin kórsetedi. Memlekettik rámizder – el maqtanyshy. Eltańbamyz, kók Týymyz ben Ánuranymyz ár azamattyń júreginen erekshe oryn alady. Bul – naǵyz otanshyldyq belgisi. Ult nyshandary – halqymyzdyń bolmys-bitiminiń aınasy, jarqyn bolashaǵymyzdyń kepili, – dedi Memleket basshysy.

Prezıdent bıyl memlekettiligimizdiń berik tiregi – Ata Zańymyzdyń qabyldanǵanyna 30 jyl tolatynyn eske saldy.

– Negizgi zań bizdiń qoǵam arqa súıeıtin basty qaǵıdattardan turady. Konstıtýııa arqyly zań men tártiptiń ústemdigin qamtamasyz etip, aýqymdy ózgeristerdi kezeń-kezeńimen qolǵa alyp jatyrmyz. Qazaqstannyń ósip-órkendeýine árqaısysymyz úles qosyp kelemiz. Bizdi kók pasportymyz, reformalardyń jasampaz qýatyna degen ortaq maqsat pen myzǵymas senim biriktiredi. Qazaqta «Týy birdiń – túbi bir, joly birdiń – júgi bir» degen sóz bar. Elimizdegi túrli etnos ókilderi kók baıraqtyń astynda tutasyp, tatý-tátti ómir súrip jatyr. Bizdiń múddemiz de, jolymyz da, muratymyz da – ortaq. Bul – Ádiletti, Qaýipsiz ári Taza Qazaqstandy qurý. Osy bereke-birligimizdi saqtap, nyǵaıta bersek, kez kelgen bıikti baǵyndyramyz, – dedi Qasym-Jomart Toqaev.

Sodan keıin Prezıdent oqýyn úzdik bitirgen kýrsanttarǵa tý túbinde shen tapsyrý jaqsy dástúrge aınalǵanyn aıta kelip, jas sarbazdarǵa sóz arnady.

– Kók baıraq jaýyngerlerge aıryqsha kúsh-jiger beredi, otanshyldyq rýhyn kóteredi. Osyndaı sátterde ár azamat týǵan elge qyzmet etý perzenttik paryzy ekenin tereń uǵynady. «Tulpar minip, tý alǵan» jaýjúrek batyrlardyń urpaǵy ekenin sezinedi. Otan kúzetinde turǵan ulandarymyzdy bahadúr babalardyń búgingi izbasary deýge bolady. Qasterli Týymyzdy árdaıym tik ustańyzdar! Men buǵan kámil senemin! Baıraǵymyz bıikte jelbiresin! Elimiz aman, jurtymyz tynysh bolsyn!, – dedi Memleket basshysy.

Tý kóterý rásimine memlekettik organdardyń basshylary, Parlament depýtattary, Ulttyq quryltaı músheleri, «Halyq qaharmany» men «Qazaqstannyń Eńbek Eri» ataǵynyń ıegerleri, joǵary áskerı oqý oryndarynyń kýrsanttary men olardyń týystary qatysty.