Prezıdent Nazarbaev pen Pýtınniń ne úshin kezdeskenin aıtty

«Kez kelgen dáýirdiń jaqsy jaǵy da, kóleńkeli tustary da bar. Bizdiń jańa tarıhymyzda jarqyn sátter áldeqaıda kóp boldy. Bul – aqıqat. Salystyrmaly túrde alǵanda, qysqa merzim ishinde memlekettigimizdiń berik tuǵyry qalyptasty, bılik ınstıtýttary quryldy, jańa astanamyz boı kóterdi, shekaramyz shegendelip, zań júzinde bekitildi. Kóptegen elmen tıimdi qarym-qatynas ornatyldy, ekonomıkaǵa shetelden ınvestıııa tartyldy. Osy jetistiktiń bárin joqqa shyǵarý durys bolmas edi. Biz ádiletti memleket quramyz desek, tarıhqa da, ony jasaýǵa atsalysqan azamattarǵa da ádil qaraýymyz kerek. Munyń bári, túptep kelgende, ulttyń bolashaǵy úshin qajet. О́tkendi oı eleginen ótkizip, ony ádil ári shynaıy baǵalaı almasaq, alǵa senimmen qadam basa almaımyz. Saıası ahýaldyń yqpalymen óz tarıhyńdy kópe-kórineý burmalaı berýge bolmaıdy. El shejiresin basynan bastap qaıta jazý tipti qaýipti. Árıne, Nursultan Nazarbaev uzaq jyl boıy el tizginin ustaǵan ýaqytta kemshilikter boldy. Biraq eshteńe istemegen adam ǵana qatelespeıdi».Qasym-Jomart Toqaev

Toqaev Nazarbaev otstavkaǵa ketkenimen, Qaýipsizdik Keńesiniń tóraǵasy bolyp otyrǵan kezde saıası sypaıylyqty saqtaı bermeıtinin aıtty.

«Únemi Premer-mınıstrdi, Ulttyq banktiń tóraǵasyn, mınıstrlerdi, ákimderdi shaqyryp alyp, jınalys ótkizetin. Buǵan óz azamattarymyzdy bylaı qoıǵanda, shetel basshylary men dıplomattary da tańdana qaraıtyn. «Nazarbaev qyzmetinen ketken soń tipti joǵarylady, endi Prezıdent te oǵan baǵynady» degen ázil áńgime de paıda boldy. Al, shyn máninde, bul ázildeıtin jaǵdaı emes edi».Qasym-Jomart Toqaev

Memleket basshysynyń sózinshe, bul jaǵdaı qosarlanǵan bılik týraly alyp qashpa áńgimeniń órshýine ákep soqty.

«Sheneýnikter de kabınetten kabınetke júgirip, kimniń tapsyrmasyn oryndaıtynyn bilmeı dal bolatyn. Ol az deseńiz, keıbir sheneýnikter «Elbasy ınstıtýty Prezıdent bıliginen joǵary turýǵa tıis» dep, aqylǵa syımaıtyn jaǵdaıdy zań júzinde negizdemek boldy. Nursultan Nazarbaevtyń 2021 jylǵy qarashada ótken Astana Club jıynynda 92 jastaǵy Mahathır Mohamadty mysalǵa keltirip, óziniń Aqordaǵa qaıtyp kelýi múmkin ekenin málimdeýin jáne burynǵy prezıdenttiń sol jyly jeltoqsan aıynda Sankt-Peterbýrg qalasynda ótken TMD elderiniń sammıtine qatysýyn naǵyz bılik daǵdarysyna ákep soqtyrǵan negizgi oqıǵalar deýge bolady. Sonyń aldynda ǵana jergilikti bir saıasattanýshy oǵan «Elbasynyń altyn dáýirin» qalpyna keltirý úshin batyl sharalar qabyldaý qajettigin aıtyp, arandatýshylyq mazmundaǵy hat joldaǵan edi».Qasym-Jomart Toqaev

Prezıdent qazir parasattylyq tanytyp, Nursultan Nazarbaevtyń Qazaqstanǵa sińirgen tarıhı eńbegin laıyqty baǵalaý kerek ekenin atap ótti.

«Men Prezıdent retinde memleket múddesin basshylyqqa alýǵa, el birligin bárinen bıik qoıýǵa mindettimin. Sizdiń suraǵyńyzǵa kelsek, qazir biz shamamen aıyna bir ret telefon arqyly sóılesip turamyz», – dedi ol.

Toqaev sonymen birge jaqynda Nazarbaevtyń Máskeýge baryp, Vladımır Pýtınmen kezdesýine de qatysty pikir bildirdi.

«Nursultan Nazarbaev pen Vladımır Pýtınniń jeltoqsandaǵy kezdesýi ótken jyldaǵy ekinshi júzdesýi ǵoı deımin. Kúz basyndaǵy birinshi kezdesý týraly buqaralyq aqparat quraldarynda aıtylǵan joq. Olar baıyrǵy dostar ári áriptester retinde júzdesetin bolsa kerek, ortaq áńgimeleri de bar shyǵar. Mundaı kezdesýler ádette Nursultan Ábishulynyń bastamasymen ótedi. Ol úshin munyń mańyzy zor. Burynǵy Qazaq KSR Mınıstrler Keńesiniń tóraǵasy, partııa basshysy jáne egemen Qazaqstannyń prezıdenti retinde Nursultan Ábishulynyń Kremlmen tyǵyz moraldyq jáne saıası baılanysy baryn esten shyǵarmaǵan jón. Onyń talaı ýaqyty Máskeýde ótti, san márte issaparǵa bardy, sezd jáne pleným otyrystaryna qatysty, jumys babymen jáne resmı saparlarmen de boldy».Qasym-Jomart Toqaev