Prezıdent: Reformalardy iske asyrýda máslıhattardyń orny aıryqsha

Foto: ashyq derekkóz

Máslıhattar jalpyulttyq mindetterdi júzege asyrýǵa úles qosýy kerek. Bul týraly Qazaqstan Prezıdenti Qasym-Jomart Toqaev aıtty, – dep habarlaıdy qandastar.kz

Prezıdent reformalardy óńirlerde iske asyrýda máslıhattardyń orny aıryqsha ekenin atap ótti.

«Byltyr meniń tóraǵalyǵymmen ótken elimizdiń áleýmettik-ekonomıkalyq damýyna arnalǵan keńeıtilgen keńeske kóptegen depýtattar qatysty. Mundaı jıyn aldaǵy ýaqytta da ótip turady. Sebebi reformalardy óńirlerde iske asyrýda máslıhattardyń orny aıryqsha. Máslıhattardyń memlekettik jáne qoǵamdyq mindetterdi júzege asyrýǵa etene aralasýy, ózderi túrli bastama kóterýi mańyzdy. Osy oraıda «AMANAT» partııasynyń qoǵamdaǵy ózekti máselelerdi sheshýge baǵyttalǵan jobalaryn erekshe atap ótkim keledi.

Sondyqtan jastarǵa, áıelderge, kásipkerlerge, zeınetkerlerge, erekshe qajettilikteri bar adamdarǵa qoldaý kórsetý, halyqtyń qaryz júktemesin azaıtý, aýyl turǵyndarynyń kirisin arttyrý, paıdalanylmaı jatqan jáne zańsyz berilgen jerlerdi qaıtarý, ekologııalyq, qarjylyq saýattylyqty jetildirý, sondaı-aq qoǵamdaǵy oqý mádenıetin qalyptastyrý sııaqty jobalar – aıryqsha nazar aýdarýdy qajet etetin ózekti máseleler. Men Úkimetke «Qaryzsyz qoǵam» jáne «Aýyl amanaty» sekildi partııalyq jobalardyń aýqymyn keńeıtýge kómektesýdi tapsyrdym.

Memleket adal eńbegimen turmysyn jaqsartýǵa daıyn jandarǵa árqashan qoldaý kórsetedi. Bul «Adal eńbek – Adal tabys» qaǵıdasyna tolyq sáıkes keledi jáne Ádiletti Qazaqstan qurýdyń negizgi faktorlarynyń biri. Sondyqtan kelesi jyldy Jumysshy mamandyqtar jyly dep jarııaladym. Osy arqyly qoǵamda eńbek qundylyǵy men kásibı biliktiliktiń ornyǵýyna yqpal etemiz dep senemin», – dedi Qasym-Jomart Toqaev.