Jańalyqtar
Prezıdent: Sapaly bilim men kásibı daǵdyny meńgergen mamandar óte qajet
Foto: Aqorda
EXPO kórme alańynda bolashaq mamandardyń, jumys berýshiler men kásiptik-tehnıkalyq uıymdardyń basyn qosqan «Jumysshy mamandyqtarynyń qalasy» festıvali ótip jatyr, – dep habarlaıdy qandastar.kz Aqordaǵa silteme jasap.
Bul – Memleket basshysy Qasym-Jomart Toqaevtyń bastamasymen jarııalanǵan «Jumysshy mamandyqtary jylyndaǵy» alǵashqy aýqymdy is-shara. Festıval Oqý-aǵartý mınıstrliginiń uıymdastyrýymen jáne basqa da salalyq vedomstvolardyń, ulttyq kompanııalar men iri kásiporyndardyń qoldaýymen ótip jatyr. Qalashyqtaǵy 40 ınteraktıvti kórmede 200-den astam mamandyqtyń qyr-syryna qanyǵyp, ekonomıka sektorlarynyń erekshelikterimen tanysýǵa bolady. Festıval aıasynda birneshe kún boıy túrli semınarlar, sheberlik saǵattary, ınnovaııalyq sessııalar men jumys jármeńkeleri uıymdastyrylady. Alǵashqy eki kúnde is-sharaǵa 15 myńnan astam adam kelgen.
Memleket basshysy «Jumysshy mamandyqtarynyń qalasyn» aralap kórgen soń óńirlerden kelgen jastarmen júzdesti. Prezıdent kez kelgen eńbek qadirli, qurmetke laıyq ekenine nazar aýdaryp, jastardy aıanbaı eńbek etýge shaqyrdy.
Sonymen qatar Qasym-Jomart Toqaev Ýkraına tóńiregindegi jaǵdaı týraly pikir bildirip, elimizdiń tynyshtyǵy men turaqtylyǵy eń basty qundylyq ekenine nazar aýdardy.
– Biz «Birligimiz – áralýandyqta» ıdeologııasyn temirqazyq etip ustanyp otyrmyz. Ultymyz ben nanym-senimimiz ártúrli ekenine qaramastan, bir qoǵamda tutas halyq bolyp ómir súremiz. Men barshańyzdy osynaý tereń úderisti tolyq túsinýge shaqyramyn. Sonda ǵana tabysqa jete alamyz.
Qazir Ýkraına jóninde kóp aıtylyp jatyr. Biz alǵashqy kezden bastap osy soǵysty mindetti túrde toqtatý kerek, dıplomatııalyq kelissózder arqyly bir mámilege kelý qajet dep aıttyq. Bul ustanymymyz endi shyndyqqa aınaldy. Eki alpaýyt el saıası suhbat júrgize bastady. Bul – jaqsy úrdis. Ári Qazaqstanǵa paıdasyn tıgizedi. Sondyqtan biz muny meılinshe qoldaımyz, – dedi Prezıdent.
