الەم جاڭالىقتارى
پرەزيدەنت شىۇ سامميتىنەن نە كۇتەتىنىن ايتتى
فوتو: تەنگرينيۋس
2-4 شىلدە كۇندەرى پرەزيدەنت قاسىم-جومارت توقاەۆتىڭ شاقىرۋىمەن قىتاي حالىق رەسپۋبليكاسىنىڭ توراعاسى سي تسزينپين قازاقستانعا مەملەكەتتىك ساپارمەن كەلەدى. سونداي-اق شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ 24-ءشى وتىرىسىنا قاتىسادى. ساپار قارساڭىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ سينحۋا اگەنتتىگىنە جازباشا سۇحبات بەردى.
ول سۇحباتتا شانحاي ىنتىماقتاستىق ۇيىمىمەن ەرەكشە قارىم-قاتىناستا ەكەنىن اتاپ ءوتتى.
«1996 جىلى ساۋىردە ونىڭ قۇرىلۋىنا قاتىسۋعا, كەلىسسوزدەرگە جانە قۇجاتتاردى دايىنداۋعا قاتىسۋعا مۇمكىندىگىم بولدى. «شانحاي بەستىگى» قۇرىلۋىنىڭ باسىندا وزدەرىنىڭ امبيتسيالارىن كورسەتتى جانە بۇگىنگى كۇنگە دەيىن سەنىم شارالارىن ارتتىرۋ توڭىرەگىندە قالىپتاستى», — دەدى توقاەۆ.
پرەزيدەنتتىڭ ايتۋىنشا, بيىل 3 شىلدەدە, شيرەك عاسىردان ءسال استام ۋاقىتتان كەيىن شانحاي كەڭىستىگىنىڭ جيىنى قازاقستانعا قايتا ورالۋىنىڭ سيمۆوليكالىق ءمانى بار.
«وسى جىلدار ىشىندە شانحاي بەستىگىنىڭ قۇرامى ەكى ەسەگە ارتىپ, استاناداعى سامميتتەن ۇيىم تولىققاندى شانحاي وندىعى فورماتىندا جۇمىس ىستەي باستايدى. شىۇ-عا توراعالىق وتە ماڭىزدى جانە سونىمەن بىرگە وتە جاۋاپتى ميسسيا ەكەنىن ەرەكشە اتاپ وتكىم كەلەدى. ۇيىمنىڭ نەگىزىن قالاۋشىلاردىڭ ءبىرى جانە كوپجاقتى ديالوگتى دامىتۋدىڭ بەلسەندى قولداۋشىسى رەتىندە قازاقستان ۇيىمدى ءوزىنىڭ تەڭگەرىمدى سىرتقى ساياساتىنداعى تۇراقتى باسىمدىق رەتىندە قاراستىرادى», — دەدى مەملەكەت باسشىسى.
مەملەكەت باسشىسىنىڭ ايتۋىنشا, ءدال وسى ۋاجدەر قازاقستان توراعالىعىنىڭ قاعيداتتارى مەن كەڭ اۋقىمدى كۇن ءتارتىبىن ازىرلەۋدە باسشىلىق ەتتى.
ء«بىزدىڭ كۇش-جىگەرىمىز قاۋىپسىزدىك ماسەلەلەرىن شەشۋدىڭ ورتاق تاسىلدەرىن ازىرلەۋگە, ساۋدا-ەكونوميكالىق ىنتىماقتاستىقتى نىعايتۋعا, قورشاعان ورتانى قورعاۋعا جانە حالىقتارىمىز اراسىنداعى دوستىق بايلانىستاردى نىعايتۋعا باعىتتالاتىن بولادى», — دەدى پرەزيدەنت سۇحباتىندا.
توقاەۆى ۇيىمنىڭ ءىرى حالىقارالىق جانە وڭىرلىك قۇرىلىمدارمەن بايلانىسىن كەڭەيتۋ ارقىلى ونىڭ حالىقارالىق بەدەلىن ودان ءارى نىعايتۋ ماڭىزدى مىندەت ەكەنىنە توقتالدى. مەملەكەت باسشىسىنىڭ سوزىنشە, قازىردىڭ وزىندە 150-دەن استام ءىس-شارا وتكىزىلدى: نيۋ-يوركتەن بەيجىڭگە, نايروبيدەن ماسكەۋگە دەيىن. وسىلايشا, شىۇ سەرىكتەستەرىنىڭ شەڭبەرى كەڭەيىپ, قۇقىقتىق بازا بىرقاتار قۇجاتتارمەن تولىعادى.
«توراعالىعىمىزدىڭ شارىقتاۋ شەگى استاناداعى سامميت بولماق, وعان ءبىز كوبىرەك كوڭىل بولەمىز. ءبىز شىۇ قىزمەتىن ودان ءارى جەتىلدىرۋ سالاسىندا ستراتەگيالىق ماڭىزدى شەشىمدەر قابىلدانادى دەپ كۇتەمىز. ورتا مەرزىمدى كەزەڭگە ارنالعان ءوزارا ءىس-قيمىلدىڭ نەگىزگى باعىتتارى ايقىندالىپ, اعىمداعى سىن-قاتەرلەر مەن قاۋىپ-قاتەرلەرگە ۋاقتىلى دەن قويۋ ءۇشىن باستامالار ازىرلەنەتىن بولادى. ءسامميتتىڭ قورىتىندى شەشىمدەرىندە «شانحاي رۋحىنىڭ» ىرگەلى قاعيداتتارى – ءوزارا سەنىم, دوستىق, تيىمدىلىك جانە ءبىر-ءبىرىنىڭ مۇددەلەرىن ەسكەرۋ تولىق قامتىلادى دەپ كۇتەمىز», — دەدى پرەزيدەنت سينحۋا اگەنتتىنىگە بەرگەن سۇحباتىندا.
