پرەزيدەنت سي تسزينپينمەن كەلىسسوز جۇرگىزدى

فوتو: اقوردا

پرەزيدەنت قاسىم-جومارت توقاەۆ تاريحي تيانتسزين شاھارىندا قوناقجايلىق تانىتقانى ءۇشىن توراعا سي تسزينپينگە العىس ايتتى. مەملەكەت باسشىسى شانحاي ىنتىماقتاستىق ۇيىمىنىڭ سامميتىنە قاتىسۋعا شاقىرۋدى زور ىقىلاسپەن قابىل العانىن جەتكىزدى, دەپ حابارلايدى qandastar.kz

– ءبىز ءسىزدىڭ ەلىڭىزدىڭ وسى ۇيىمعا توراعالىق ەتۋىن تولىق قولدايمىز. ۇيىمنىڭ كۇن تارتىبىندە تۇرعان ماسەلەلەردى تالقىلاۋ جۇمىسىنا بەلسەنە اتسالىسىپ جاتىرمىز. سونداي-اق ءسىزدى ەكىنشى دۇنيەجۇزىلىك سوعىستاعى جەڭىس پەن قىتايدىڭ جاپون باسقىنشىلىعىنا قارسى سوعىستاعى جەڭىسىنىڭ 80 جىلدىعىمەن قۇتتىقتايمىن. ءسىزدىڭ ەلىڭىز ءفاشيزمدى جەڭۋگە ولشەۋسىز ۇلەس قوستى. قىتاي حالقى سوعىس جىلدارىندا ناعىز باتىلدىق, شىنايى وتانشىلدىق, قايتپاس قايسارلىقتىڭ وزىق ۇلگىسىن كورسەتتى. مۇنى ءبارى جاقسى بىلەدى جانە جوعارى باعالايدى, – دەدى مەملەكەت باسشىسى.

قازاقستان پرەزيدەنتى قحر توراعاسى سي ءتسزينپيننىڭ تىكەلەي قولداۋىمەن قازاق-قىتاي قاتىناسى بۇرىن-سوڭدى بولماعان قارقىنمەن دامىپ جاتقانىن زور ريزاشىلىقپەن اتاپ ءوتتى.

بۇل بايلانىس ماڭگىلىك ءارى جان-جاقتى ستراتەگيالىق سەرىكتەستىك رۋحىندا نىعايۋدا.

بىلتىر ەكى ەل اراسىنداعى تاۋار اينالىمى 44 ميلليارد دوللارعا جەتتى. بۇل – ەڭ جوعارى كورسەتكىش.

– وسى وڭ ءۇردىس بيىل دا ساقتالىپ وتىر. قىتاي – قازاقستاننىڭ ەڭ ءىرى ساۋدا سەرىكتەسى. ورتاق ءىرى جوبالارىمىز جۇزەگە اسىرىلىپ جاتىر. مەن وسى ساپارىمنىڭ اياسىندا قازاق-قىتاي ىسكەرلىك كەڭەسىنىڭ وتىرىسىنا قاتىسامىن. قىتايدىڭ بىرقاتار ءىرى كومپانياسىنىڭ باسشىلارىمەن كەزدەسەمىن. بيىل قازاقستاندا قىتاي ءتۋريزمى جىلى ەكەنىن ەرەكشە كوڭىلمەن اتاپ وتكىم كەلەدى. ەكى ەلدىڭ مادەني-گۋمانيتارلىق ىقپالداستىعىن نىعايتۋعا قولايلى جاعداي جاسالعان. سونىڭ جارقىن مىسالى – قازاقستاندا «لۋ بان زەرتحاناسىنىڭ» ەكىنشى جانە ءۇشىنشى فيليالدارى اشىلاتىن بولدى. بەيجىڭ قالاسىندا قازاقستاننىڭ مادەنيەت ورتالىعىن اشۋ تۋرالى شەشىمىڭىز ءۇشىن سىزگە زور العىس ايتامىن, – دەدى پرەزيدەنت.