پرەزيدەنت سۋ شارۋاشىلىعى سالاسىنىڭ قىزمەتكەرلەرىن ماراپاتتادى

پرەزيدەنت سۋ شارۋاشىلىعى قىزمەتكەرلەرىن كاسىبي مەرەكەسىمەن قۇتتىقتاپ, سۋ – بۇكىل تىرشىلىكتىڭ كوزى, الەمدەگى بارلىق ەل ءۇشىن اسا ماڭىزدى ستراتەگيالىق رەسۋرس ەكەنىن ايتتى, دەپ حابارلايدى Qandastar.kz.

– ءبىزدىڭ كەڭ بايتاق جەرىمىز بار. الايدا ەل اۋماعىنىڭ جارتىسىنان كوبى ءشول جانە شولەيت جەرلەر. سوندىقتان قازاقستان ءۇشىن سۋ ماسەلەسى ۇلتتىق قاۋىپسىزدىك ماسەلەسى دەسەك, ارتىق بولمايدى. بۇل سالا ءاردايىم مەملەكەتتىڭ ايرىقشا نازارىندا. 2023 جىلى حالىققا جولداۋىمدا مەن سۋدى ءتيىمدى پايدالانۋ جايىنا ەرەكشە توقتالدىم. ەلىمىزدە سۋ رەسۋرستارى جانە يرريگاتسيا مينيسترلىگى قۇرىلدى. ناقتى مىندەتتەر ايقىندالىپ, اۋقىمدى رەفورمالار قولعا الىندى. جاڭا سۋ كودەكسى قابىلداندى. ءىرى ينفراقۇرىلىمدىق جوبالار جۇزەگە اسىرىلىپ جاتىر. سۋ نىساندارىن سالۋعا جانە قالپىنا كەلتىرۋگە قوماقتى قاراجات ءبولىندى. شەتەلدەن ينۆەستيتسيا تارتىلۋدا. قازىر وسى سالادا 30 مىڭعا جۋىق ادام جۇمىس ىستەيدى. ولار قالا مەن اۋىلدى, وندىرىستەر مەن ەگىس القاپتارىن سۋمەن قامتاماسىز ەتۋدە, – دەدى قاسىم-جومارت توقاەۆ.

پرەزيدەنت سۋ سالاسىندا مىقتى ماماندار ءالى دە جەتىسپەيتىنىن اتاپ ءوتتى.

– بىلتىر قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى قۇرىلدى. وسى ماماندىققا بولىنەتىن گرانت سانى ەكى ەسە ارتتى. 500-دەن استام ستۋدەنت بيۋدجەت قارجىسىنا ءبىلىم الىپ جاتىر. ولار وقۋىن اياقتاعان سوڭ «ديپلوممەن – اۋىلعا» باعدارلاماسى اياسىندا جۇمىس ىستەي الادى. سونداي-اق 120 قىزمەتكەر قىتايدا تاجىريبە الماسىپ, قوسىمشا ءبىلىم الۋدا. سۋ شارۋاشىلىعى ماماندارىنىڭ الەۋمەتتىك جاعدايىن جاقسارتۋعا باسا ءمان بەرىلۋدە. بىلتىر ولاردىڭ جالاقىسى 25 پايىزعا ءوستى. بيىل دا كوبەيەدى. ءبىر سوزبەن ايتساق, جۇيەلى جۇمىس ىستەلىپ جاتىر, – دەدى مەملەكەت باسشىسى.

سالتاناتتى ءىس-شارادا قاسىم-جومارت توقاەۆ قازاقستاننىڭ سۋ شارۋاشىلىعىن دامىتۋعا ەلەۋلى ۇلەس قوسقان ءبىر توپ ازاماتتى مەملەكەتتىك ناگرادامەن ماراپاتتادى. بىلتىر «قازاقستاننىڭ سۋ شارۋاشىلىعى سالاسىنىڭ ەڭبەك سىڭىرگەن قايراتكەرى» قۇرمەتتى اتاعى بەكىتىلدى. بۇگىن وسى اتاق بىرقاتار ارداگەرگە بەرىلدى.