پرەزيدەنت تاپسىرماسى: سۋ تاسقىنىنان زارداپ شەككەندەرگە تۇرعىن ءۇي سالۋ ماسەلەسى قاتاڭ باقىلاۋدا

فوتو: primeminister.kz

پرەمەر-مينيستر ولجاس بەكتەنوۆتىڭ توراعالىعىمەن وتكەن كەڭەستە الەۋمەتتىك نىساندار مەن ينفراقۇرىلىمدى قالپىنا كەلتىرۋ, سونداي-اق سۋ تاسقىنى سالدارىنان زارداپ شەككەندەرگە تۇرعىن ءۇي سالۋ جانە ساتىپ الۋ ماسەلەلەرى قارالدى.

ونەركاسىپ جانە قۇرىلىس, وقۋ-اعارتۋ, دەنساۋلىق ساقتاۋ, ەنەرگەتيكا, كولىك مينيسترلىكتەرىنىڭ باسشىلارى مەن بىرقاتار وبلىس اكىمدەرى سۋ تاسقىنى سالدارىن جويۋ جۇمىستارىنىڭ بارىسى تۋرالى باياندادى.

اپاتتى دەپ تانىلعان 8 650 ءۇيدىڭ يەسىنە قايتالاما نارىقتان ءۇي ساتىپ الىنۋدا نەمەسە جاڭاسى سالىنىپ جاتىر. ونەركاسىپ جانە قۇرىلىس ءمينيسترى قانات شارلاپاەۆتىڭ ايتۋىنشا, 2 569 جاڭا ءۇي سالىنىپ جاتىر, ولاردىڭ 619-ى تولىقتاي دايىن. 2 431 ءۇيدىڭ ىرگەتاسى تۇرعىزىلدى, 2 207 ءۇيدىڭ قابىرعاسى قالاندى, 2 007 نىسان شاتىرى جابىلدى.

جوندەلۋى ءتيىس 9 189 نىساننىڭ 8 939-ىندا (97%) جۇمىستار اياقتالعان. ساتىپ الۋ جوسپارلانعان 6 081 ءۇي مەن پاتەردىڭ بۇگىندە 4 918-ءى (81%) ساتىپ الىندى.

پرەمەر-مينيستر سۋ تاسقىنى سالدارىن جويۋ جانە ازاماتتاردىڭ مۇلكىن قالپىنا كەلتىرۋ بويىنشا بەلسەندى جۇمىس جۇرگىزىلسە دە, بەكىتىلگەن كەستەلەردەن كەشىگۋ فاكتىلەرى بار ەكەنىنە توقتالدى.

«مەملەكەت باسشىسىنىڭ سۋ تاسقىنىنان زارداپ شەككەندەردى ۋاقىتىلى تۇرعىن ۇيمەن قامتاماسىز ەتۋ جونىندەگى مىندەتى مەرزىمىندە ورىندالۋى ءتيىس. رەسپۋبليكالىق شتاب قاجەتتى شەشىمدەردى قابىلدادى, قارجى تولىق كولەمدە ءبولىندى. بارلىق رەسۋرستاردى جۇمىلدىرىپ, جۇمىستى جانداندىرۋ قاجەت», — دەپ اتاپ ءوتتى ولجاس بەكتەنوۆ.

سونداي-اق ۇكىمەت باسشىسىنا الەۋمەتتىك نىسانداردى قالپىنا كەلتىرۋ جۇمىستارى تۋرالى باياندالدى.

سۋ تاسقىنى سالدارىنان ەلىمىزدىڭ 6 وڭىرىندە 11 مىڭعا جۋىق بالا وقيتىن 40 ءبىلىم بەرۋ ۇيىمى زارداپ شەكتى. بۇل باعىتتا دا قالپىنا كەلتىرۋ جۇمىستارى بەلسەندى تۇردە اتقارىلىپ جاتىر.

اقتوبە وبلىسىندا 8 نىسانعا كۇردەلى جانە اعىمداعى جوندەۋ جۇمىستارى جۇرگىزىلۋدە. ۇكىمەت رەزەرۆىنەن 6 جاڭا ءبىلىم بەرۋ مەكەمەسىنىڭ قۇرىلىسىنا 6,2 ملرد تەڭگە ءبولىندى.

اتىراۋ وبلىسىنداعى 6 نىساندا جوندەۋ جۇمىستارى 50%-عا اياقتالدى. سونىمەن قاتار بالاباقشا مەن مەكتەپ قۇرىلىسى باستالدى.

باتىس قازاقستان وبلىسىندا 4 نىساننىڭ اعىمداعى جوندەۋ جۇمىستارىن 1 قىركۇيەككە دەيىن اياقتاۋ جوسپارلانىپ وتىر. سولتۇستىك قازاقستان وبلىسىندا سۋ باسقان 5 ءبىلىم بەرۋ ۇيىمىنىڭ ۇشەۋى وقۋ جىلىن باستاۋعا دايىن. اقمولا جانە قوستاناي وبلىستارىنداعى ءبىلىم بەرۋ مەكەمەلەرىندە جوندەۋ جۇمىستارى اياقتالۋعا جاقىن. اتالعان وڭىرلەردە 6 نىسان زاقىمدانعان, سولاردىڭ بىرەۋى بۇزىلىپ, ورنىنا جاڭا عيمارات سالىنادى.

سونىمەن قاتار وڭىرلەردە 8 مەديتسينا مەكەمەسى زارداپ شەكتى. ءۇش نىساننىڭ قۇرىلىسى «اۋىلدا دەنساۋلىق ساقتاۋدى جاڭعىرتۋ» باعدارلاماسى اياسىندا جۇرگىزىلۋدە. تاعى ءۇش نىساندا اعىمداعى جانە كۇردەلى جوندەۋدى قاجەت ەتەدى, ال بىرەۋىنىڭ ورنىنا جاڭا عيمارات سالۋ جوسپارلانعان.

بۇگىنگى تاڭدا رەسپۋبليكالىق ماگيسترالداردىڭ 102 ۋچاسكەسىندە جۇمىستار تولىعىمەن اياقتالدى.

گاز تاسىمالداۋ ينفراقۇرىلىمى نىساندارى شتاتتىق رەجيمدە جۇمىس ىستەيدى.

ونەركاسىپ جانە قۇرىلىس مينيسترلىگىنە اكىمدىكتەرمەن بىرلەسىپ, بارلىق جۇمىستار اياقتالعانعا دەيىن قۇرىلىس نىساندارىندا ۇيلەستىرۋ مەن باقىلاۋ جۇمىستارىن كۇشەيتۋ تاپسىرىلدى.