Prezıdent tapsyrmasy: Sý tasqynynan zardap shekkenderge turǵyn úı salý máselesi qatań baqylaýda

Foto: primeminister.kz

Premer-Mınıstr Oljas Bektenovtiń tóraǵalyǵymen ótken keńeste áleýmettik nysandar men ınfraqurylymdy qalpyna keltirý, sondaı-aq sý tasqyny saldarynan zardap shekkenderge turǵyn úı salý jáne satyp alý máseleleri qaraldy.

О́nerkásip jáne qurylys, oqý-aǵartý, densaýlyq saqtaý, energetıka, kólik mınıstrlikteriniń basshylary men birqatar oblys ákimderi sý tasqyny saldaryn joıý jumystarynyń barysy týraly baıandady.

Apatty dep tanylǵan 8 650 úıdiń ıesine qaıtalama naryqtan úı satyp alynýda nemese jańasy salynyp jatyr. О́nerkásip jáne qurylys mınıstri Qanat Sharlapaevtyń aıtýynsha, 2 569 jańa úı salynyp jatyr, olardyń 619-y tolyqtaı daıyn. 2 431 úıdiń irgetasy turǵyzyldy, 2 207 úıdiń qabyrǵasy qalandy, 2 007 nysan shatyry jabyldy.

Jóndelýi tıis 9 189 nysannyń 8 939-ynda (97%) jumystar aıaqtalǵan. Satyp alý josparlanǵan 6 081 úı men páterdiń búginde 4 918-i (81%) satyp alyndy.

Premer-Mınıstr sý tasqyny saldaryn joıý jáne azamattardyń múlkin qalpyna keltirý boıynsha belsendi jumys júrgizilse de, bekitilgen kestelerden keshigý faktileri bar ekenine toqtaldy.

«Memleket basshysynyń sý tasqynynan zardap shekkenderdi ýaqytyly turǵyn úımen qamtamasyz etý jónindegi mindeti merziminde oryndalýy tıis. Respýblıkalyq shtab qajetti sheshimderdi qabyldady, qarjy tolyq kólemde bólindi. Barlyq resýrstardy jumyldyryp, jumysty jandandyrý qajet», — dep atap ótti Oljas Bektenov.

Sondaı-aq Úkimet basshysyna áleýmettik nysandardy qalpyna keltirý jumystary týraly baıandaldy.

Sý tasqyny saldarynan elimizdiń 6 óńirinde 11 myńǵa jýyq bala oqıtyn 40 bilim berý uıymy zardap shekti. Bul baǵytta da qalpyna keltirý jumystary belsendi túrde atqarylyp jatyr.

Aqtóbe oblysynda 8 nysanǵa kúrdeli jáne aǵymdaǵy jóndeý jumystary júrgizilýde. Úkimet rezervinen 6 jańa bilim berý mekemesiniń qurylysyna 6,2 mlrd teńge bólindi.

Atyraý oblysyndaǵy 6 nysanda jóndeý jumystary 50%-ǵa aıaqtaldy. Sonymen qatar balabaqsha men mektep qurylysy bastaldy.

Batys Qazaqstan oblysynda 4 nysannyń aǵymdaǵy jóndeý jumystaryn 1 qyrkúıekke deıin aıaqtaý josparlanyp otyr. Soltústik Qazaqstan oblysynda sý basqan 5 bilim berý uıymynyń úsheýi oqý jylyn bastaýǵa daıyn. Aqmola jáne Qostanaı oblystaryndaǵy bilim berý mekemelerinde jóndeý jumystary aıaqtalýǵa jaqyn. Atalǵan óńirlerde 6 nysan zaqymdanǵan, solardyń bireýi buzylyp, ornyna jańa ǵımarat salynady.

Sonymen qatar óńirlerde 8 medıına mekemesi zardap shekti. Úsh nysannyń qurylysy «Aýylda densaýlyq saqtaýdy jańǵyrtý» baǵdarlamasy aıasynda júrgizilýde. Taǵy úsh nysanda aǵymdaǵy jáne kúrdeli jóndeýdi qajet etedi, al bireýiniń ornyna jańa ǵımarat salý josparlanǵan.

Búgingi tańda respýblıkalyq magıstraldardyń 102 ýchaskesinde jumystar tolyǵymen aıaqtaldy.

Gaz tasymaldaý ınfraqurylymy nysandary shtattyq rejımde jumys isteıdi.

О́nerkásip jáne qurylys mınıstrligine ákimdiktermen birlesip, barlyq jumystar aıaqtalǵanǵa deıin qurylys nysandarynda úılestirý men baqylaý jumystaryn kúsheıtý tapsyryldy.