پرەزيدەنت تاپسىرماسىمەن بەكتەنوۆ تۇرعىن ءۇيدى قالپىنا كەلتىرۋ بەلسەندىلىگىن ارتتىرۋ كەرەكتىگىن ايتتى

ولجاس بەكتەنوۆ سقو-نىڭ وڭ تاجىريبەسىن اتاپ ءوتىپ, باتىس وڭىرلەردىڭ اكىمدىكتەرىنە تۇرعىن ءۇيدى قالپىنا كەلتىرۋ قارقىنىن ارتتىرۋدى تاپسىردى,-دەپ حابارلايدى Qandastar.kz

پرەمەر-مينيستر ولجاس بەكتەنوۆ ۇكىمەت وتىرىسىندا وتكەن اپتادا سولتۇستىك قازاقستان وبلىسىندا بولعان جوندەۋ جانە قۇرىلىس جۇمىستارىنىڭ بارىسىن جاقسى دەپ باعالادى.
بۇل رەتتە ۇكىمەت باسشىسى باسقا وڭىرلەر ءالى قاجەتتى قارقىندى الا-الماي وتىرعانىن اتاپ ءوتتى.

«مەن وتكەن اپتادا سولتۇستىك قازاقستان وبلىسىنا باردىم. جوندەۋ جانە قۇرىلىس جۇمىستارىنىڭ قارقىنى جاقسى. باسقا وڭىرلەر ءالى قاجەتتى قارقىندى الا-الماي وتىر. تاعى دا ەسكە سالامىن – جاز مەزگىلى قىسقا, ءبارىن بەلگىلەنگەن مەرزىمدە, ءارى ساپالى ەتىپ جاساۋعا ءبىراز ۋاقىت تالاپ ەتىلەدى. وكىنىشكە قاراي, جەرگىلىكتى بيلىك ورگاندارىنىڭ جۇمىسىندا سالعىرتتىق, شەشىم قابىلداۋدا باياۋلىق, ۇيىمداستىرۋ ىسىندە السىزدىك بايقالادى. اسىرەسە باتىس قازاقستان جانە اتىراۋ وبلىستارىنىڭ بەلسەندىلىگىن ارتتىرۋ قاجەت. مەرزىمدەردى مۇلدەم بۇزۋعا بولمايدى.

سونداي-اق كوپتەگەن وڭىرلەردە سۋ تاسقىنىمەن كۇرەسۋ ءۇشىن قۇم مەن سازدان ۇيىندىلەر جاسالدى, توپىراق سالىنعان قاپتار پايدالانىلدى. ەندىگى كەزەكتە اكىمدىكتەر ءبارىن وركەنيەتتى تۇرگە كەلتىرۋ كەرەك. ەكولوگياعا زيان كەلتىرمەس ءۇشىن بارلىق قاپشىقتاردى الىپ تاستاپ, كادەگە جاراتۋ قاجەت», — دەپ اتاپ ءوتتى ولجاس بەكتەنوۆ.