پرەزيدەنت «تازا قازاقستان» جايلى ايتتى

فوتو: تازا قازاقستان

«تازا قازاقستان دەگەنىمىز – قورشاعان ورتانى تازا ۇستاۋ عانا ەمەس. ارينە, ول دا ماڭىزدى. سونىمەن بىرگە, بۇل – وي-سانا تازالىعى دەگەن ءسوز. بۇل تۋرالى پرەزيدەنت قاسىم-جومارت توقاەۆ ۇستازداردىڭ رەسپۋبليكالىق تامىز كونفەرەنتسياسىندا ايتتى, دەپ حابارلايدى qandastar.kz

«ءبىلىم تاربيەمەن ۇشتاسقاندا عانا بەرەكەلى, ساپالى بولادى. ءبىلىم مەن تاربيە – كەز كەلگەن قوعامنىڭ قوس تۇعىرى. بۇل ەكەۋىن ءبىر-بىرىنەن ءبولىپ قاراۋعا بولمايدى.

مەكتەپ – ءبىلىم مەن ءتالىم-تاربيەنىڭ كيەلى ورداسى. ۇلى اباي «ادام بالاسى ادام بالاسىنان اقىل, عىلىم, ار, مىنەز دەگەن نارسەلەرمەن وزباق» دەگەن. وسكەلەڭ ۇرپاقتى بىلىمپازدىققا باۋلۋ قانشالىقتى ماڭىزدى بولسا, ولارعا دۇرىس جول كورسەتۋ, باعدار بەرۋ دە سونشالىقتى ماڭىزدى. ءبىز جاستاردىڭ ادال ءارى ەڭبەكقور بولىپ وسۋىنە ەرەكشە ءمان بەرۋىمىز قاجەت. ۇل-قىزدارىمىز جاقسى مەن جاماننىڭ, اق پەن قارانىڭ اراسىن اجىراتا ءبىلۋى كەرەك.

بيىلدان باستاپ ەلىمىزدە «ادال ازامات» ءبىرتۇتاس تاربيە باعدارلاماسى جۇزەگە اسىرىلا باستايدى. بۇل باعدارلامانى بارلىق مەكتەپ, سونىڭ ىشىندە جەكەمەنشىك مەكتەپتەر دە قولدانادى. سونداي-اق, مەن وسى جوبانى پەداگوگ ماماندار دايارلايتىن جوعارى وقۋ ورىندارىنا دا ەنگىزۋدى ۇسىنامىن.

ۇلتتىق ءبىلىم سالاسىنداعى تاربيە جۇمىسىندا ءبىرتۇتاس جۇيە بولۋى كەرەك. جاس ۇرپاقتىڭ بويىنا جالپىۇلتتىق قۇندىلىقتاردى ءسىڭىرۋ قاجەت. ءاربىر جاس وتانشىل, جاسامپاز, جاڭاشىل, ءبىلىمپاز, ەڭبەكقور, ۇقىپتى, ۇنەمشىل بولىپ ءوسۋى كەرەك. سونداي ازاماتتار عانا مادەنيەتتى, قاۋىپسىز ءارى «زاڭ مەن ءتارتىپ» ۇستەمدىك قۇراتىن قوعامنىڭ ىرگەسىن قالاماق.