پرەزيدەنت تمۇ-عا مۇشە ەلدەردىڭ كەڭەسىنە قاتىستى

استانادا قاسىم-جومارت توقاەۆتىڭ توراعالىعىمەن تۇركى مەملەكەتتەرى ۇيىمىنا مۇشە ەلدەردىڭ ورتالىق (ۇلتتىق) بانكتەرى كەڭەسىنىڭ ءبىرىنشى وتىرىسى ءوتتى.

جيىندى اشقان پرەزيدەنت جۋىردا ماجارستاندا وتكەن بەيرەسمي سامميتتە ۇيىمعا مۇشە مەملەكەتتەر باسشىلارى ىنتىماقتاستىقتى تەرەڭدەتۋدىڭ ماڭىزىن راستاعانىن اتاپ ءوتتى. تاريف ساياساتىنىڭ وزگەرۋىنەن تۋىنداعان جاھاندىق ەكونوميكانىڭ ترانسفورماتسياسى جاعدايىندا مۇنىڭ ءمانى ارتا ءتۇستى.

پرەزيدەنتتىڭ ايتۋىنشا, قازىرگى كەزدەگى كۇردەلى وزگەرىستەر قيىندىقتارمەن قاتار جاڭا مۇمكىندىكتەرگە جول اشادى. اسىرەسە, كولىك جانە لوگيستيكا, اۋىل شارۋاشىلىعى, تسيفرلاندىرۋ مەن قارجى سياقتى نەگىزگى سالالاردا كۇش-جىگەردى ۇيلەستىرۋ قاجەت.

– ءبىزدىڭ ەلدەرىمىزدىڭ الەمدىك ءىجو-دەگى جيىنتىق ۇلەسى 2010 جىلعى 2,4 پايىزدىق كورسەتكىشتەن 3,1 پايىزعا دەيىن ۇلعايدى. تۇركى مەملەكەتتەرى ۇيىمىنىڭ حالىقارالىق رەزەرۆتەرى تۇراقتى تۇردە ءوسىپ كەلەدى. بۇل ايماقتىڭ ماكروەكونوميكالىق ورنىقتىلىعىنىڭ ارتقانىن كورسەتەدى, – دەدى پرەزيدەنت.

مەملەكەت باسشىسى قارجى سەكتورىنداعى ىنتىماقتاستىقتى كەڭەيتۋ بارىسىندا ورتالىق بانكتەر نەگىزگى ءرول اتقارىپ, ەكونوميكالىق جانە ينۆەستيتسيالىق سەرىكتەستىكتىڭ قوزعاۋشى كۇشىنە اينالا الادى دەپ سانايدى

– جيىننىڭ كۇن تارتىبىنە ەكونوميكالىق ۇدەرىستەرگە, اقشا-نەسيە ساياساتىنا, سونداي-اق ورتالىق بانكتەردىڭ تسيفرلىق ۆاليۋتالارى, كريپتوۆاليۋتالارى جانە تسيفرلىق اكتيۆتەرى, ياعني, قارجى تەحنولوگيالارىن دامىتۋعا قاتىستى وزەكتى تاقىرىپتاردىڭ ەنگىزىلگەنى قۋانتادى. قازاقستان بۇل سالادا ايتارلىقتاي جەتىستىككە جەتتى. اتاپ ايتقاندا, بارلىق ترانزاكتسيالار قۇرىلىمىنداعى قولما-قول اقشاسىز تولەمدەردىڭ ۇلەسى 85 پايىزدى قۇرادى. ءبىزدىڭ ۇلتتىق بانك ايماقتا ءبىرىنشى بولىپ تسيفرلىق تەڭگەنى ەنگىزدى. جاقىن ارادا تسيفرلىق اكتيۆتەردىڭ, سونىڭ ىشىندە كريپتوۆاليۋتالاردىڭ, ستەيبلكويندەردىڭ جانە توكەنيزاتسيالانعان قۇرالداردىڭ قاۋىپسىز اينالىمىن قامتاماسىز ەتەتىن جاڭا ەرەجەلەردى قابىلداۋ جوسپارلانىپ وتىر, – دەدى مەملەكەت باسشىسى.

كەڭەس سوڭىندا قاسىم-جومارت توقاەۆ ورتالىق بانكتەر اراسىنداعى كاسىبي ديالوگتىڭ كەڭەيۋى تۇركى ەلدەرىنىڭ ەكونوميكالىق الەۋەتىن ىسكە اسىرۋ ءۇشىن بەرىك نەگىز قالايتىنىنا سەنىم ءبىلدىردى.

جيىندا قازاقستان ۇلتتىق بانكىنىڭ توراعاسى تيمۋر سۇلەيمەنوۆ, ازەربايجان ورتالىق بانكىنىڭ توراعاسى تالەح تاحير وگلى كيازيموۆ, قىرعىزستان ۇلتتىق بانكىنىڭ توراعاسى مەليس تۋرگۋنباەۆ, تۇركيا ورتالىق بانكىنىڭ توراعاسى فاتيح كاراحان, وزبەكستان ورتالىق بانكىنىڭ توراعاسى تيمۋر يشمەتوۆ جانە ماجارستان ورتالىق بانكىنىڭ اتقارۋشى ديرەكتورى گابور سوچ ءسوز سويلەدى.