پرەزيدەنت: «تۇرعىن ءۇي-كوممۋنالدىق شارۋاشىلىعى مەن سۋ ينفراقۇرىلىمىن جاڭعىرتۋ – تۇراقتى دامۋدىڭ نەگىزى فاكتورى»

فوتو: اشىق دەرەككوز

ۇكىمەت پەن جەرگىلىكتى اتقارۋشى بيلىكتىڭ ارەكەتسىزدىگى سالدارىنان ەلىمىزدىڭ تۇرعىن ءۇي-كوممۋنالدىق شارۋاشىلىعى ونداعان جىل بويى قاراۋسىز قالىپ, ونىڭ جاي-كۇيى وتە مۇشكىل جاعدايعا ءتۇستى. قازىر بۇل احۋالدى وزگەرتىپ, ينفراقۇرىلىمنىڭ توزۋ دەڭگەيىن تومەندەتۋ ءۇشىن ءتيىستى شارالار قابىلدانىپ جاتىر, دەپ حابارلايدى qandastar.kz

پرەزيدەنت جولداۋدا تاريفتەردى ىرىقتاندىرۋ, ەنەرگەتيكا جانە تۇرعىن ءۇي-كوممۋنالدىق شارۋاشىلىعىنىڭ ينفراقۇرىلىمىن باسقارۋدىڭ جاڭا مودەلىن قالىپتاستىرۋ سياقتى شارالاردى اتادى.

مۇنداي ۇلگى بويىنشا, تاريفتەر وسكەن سايىن حالىققا سەنىمدى ءارى ساپالى قىزمەت كورسەتىلۋگە ءتيىس. بۇل ىسكە «اقىلدى قالا» قۇرۋ تۇجىرىمداماسىنىڭ كومەگى تيەرى ءسوزسىز, ونى ەلىمىزدىڭ بارلىق وڭىرىنە تاراتۋ كەرەك. وعان وزىق حالىقارالىق تاجىريبەلەردى قولدانىپ, بىلىكتى باسشىلاردى, سونىڭ ىشىندە شەتەل ماماندارىن تارتۋ قاجەت.

قازىرگى جاعدايدا مەملەكەت پەن بيزنەس سەرىكتەستىك ورناتپاسا, تۇرعىن ءۇي-كوممۋنالدىق شارۋاشىلىعىن جاڭعىرتۋ مۇمكىن ەمەس. بۇل – اكسيوما. كەيبىر تۇرعىن ءۇي-كوممۋنالدىق شارۋاشىلىعى نىساندارىن اكىمدىكتەردىڭ قاراماعىندا ساقتاپ قالۋ قاجەت پە, جوق پا دەگەندى جاڭاشا زەردەلەگەن ءجون.

جەكە كوممۋنالدىق نىسانداردى مەملەكەت مەنشىگىنە الۋ – داۋلى ماسەلە. ونىڭ ءبارى ەرتە مە, كەش پە, قايتادان جەكەشەگە وتەدى.

سوندىقتان مەملەكەت بۇل سالانى باقىلاپ, رەتتەۋمەن اينالىسۋعا ءتيىس. ال ونىڭ ينفراقۇرىلىمىن جاڭعىرتۋ جانە جاڭا تەحنولوگيالاردى ەنگىزۋ – جەكە سەكتوردىڭ شارۋاسى. بيلىك قۇرىلىمدارى نەگىزىنەن تسيفرلىق تاسىلدەردى قولدانا وتىرىپ, ينفراقۇرىلىم جوبالارىنىڭ اشىقتىعىن قامتاماسىز ەتۋگە مىندەتتى. سوندا ۇكىمەتكە جانە اكىمدىكتەرگە ازاماتتاردىڭ سەنىمى نىعايا تۇسەدى.

كوممۋنالدىق شارۋاشىلىقتى جاڭعىرتۋ ءىسى ينفراقۇرىلىمدار مەن تۇرعىن-ءۇي قورىن ەنەرگيانى ۇنەمدەۋگە كوشىرۋ شارالارىمەن قاتار جۇرۋگە ءتيىس».