پرەزيدەنت تۇركىستان وبلىسىنىڭ اكىمىن قابىلدادى

فوتو: اقوردا

پرەزيدەنت تۇركىستان وبلىسىنىڭ اكىمى نۇرالحان كوشەروۆتى قابىلدادى, دەپ حابارلايدى qandastar.kz

كەزدەسۋ بارىسىندا قاسىم-جومارت توقاەۆقا تۇركىستان وبلىسىنىڭ بىلتىرعى الەۋمەتتىك-ەكونوميكالىق دامۋ كورسەتكىشتەرى مەن الداعى كەزەڭگە ارنالعان جوسپارى باياندالدى.

وبلىس اكىمى يرريگاتسيا نىساندارىن قايتا قالپىنا كەلتىرۋ ءۇشىن يسلام دامۋ بانكىنەن قارجى تارتىلىپ جاتقانى جونىندە مالىمەت بەردى. قازىرگى كەزدە 135,5 ميلليارد تەڭگەگە 24 جوبانى قارجىلاندىرۋ ماقۇلداندى. بۇدان بولەك, تۇركىستان قالاسىن جانە جاقىن ماڭداعى 6 اۋداندى سۋمەن تۇراقتى قامتاماسىز ەتۋ ماقساتىندا «بايدىبەك اتا» سۋ قويماسىنىڭ قۇرىلىسى جۇرگىزىلىپ, «بورالداي» سۋ قويماسىنىڭ جوباسى ازىرلەنىپ جاتىر.

نۇرالحان كوشەروۆتىڭ ايتۋىنشا, اۋىل شارۋاشىلىعى سالاسىندا ماقتا, جۇگەرى جانە ەت كلاستەرلەرىن دامىتۋعا ايرىقشا ءمان بەرىلەدى. اتاپ ايتقاندا, ماقتا-توقىما كلاستەرىندە قۇنى 197 ميلليارد تەڭگەنى قۇرايتىن 5 جوبا ىسكە اسىرىلماق. سونىمەن قاتار جۇگەرى-سىرنە زاۋىتىنىڭ قۇرىلىسى باستالىپ, اۆستراليا تاجىريبەسىنە ساي ەت باعىتىنداعى مال شارۋاشىلىعىن دامىتۋ قولعا الىندى.

بۇگىنگى تاڭدا ەنەرگەتيكا تاپشىلىعىن شەشۋ ماقساتىندا جالپى قۋاتى 2,4 گۆت-تى قۇرايتىن 6 جوبانى ىسكە اسىرۋ كوزدەلىپ وتىر. سونىمەن قاتار يندۋستريالىق ايماقتاردى قاجەتتى ينفراقۇرىلىممەن قامتۋ ءۇشىن ءتيىستى جۇمىستار اتقارىلادى.

نۇرالحان كوشەروۆ بيىل وڭىردە 32 مەكتەپ سالىنىپ, 41 ءبىلىم وشاعىنا كۇردەلى جوندەۋ جۇرگىزىلەتىنىن ايتتى. سونداي-اق مەديتسينالىق-سانيتارلىق العاشقى كومەك كورسەتەتىن 32 نىسان پايدالانۋعا بەرىلىپ, 45 ەلدى مەكەنگە تابيعي گاز قۇبىرى تارتىلۋعا ءتيىس.

قاسىم-جومارت توقاەۆ وبلىستىڭ جاڭا باسشىسىنا كەشە قول قويىلعان «تۇركىستان قالاسىنىڭ ەرەكشە مارتەبەسى تۋرالى» زاڭدا ايقىندالعان مىندەتتەردى ساپالى جۇزەگە اسىرۋ ءۇشىن ۇكىمەتپەن تىعىز قارىم-قاتىناستا جۇمىس ىستەۋدى تاپسىردى.

سونىمەن قاتار پرەزيدەنت وبلىس تۇرعىندارىنىڭ تۇرمىس دەڭگەيىن جاقسارتۋ, تۋريزم, اۋىل شارۋاشىلىعى جانە شاعىن كاسىپكەرلىك باعىتتارىن دامىتۋ, ەلدى مەكەندەردى اۋىز سۋمەن تولىقتاي قامتاماسىز ەتۋ مىندەتتەرىن جۇكتەدى.