Prezıdent Túrkistan oblysynyń ákimin qabyldady

Foto: Aqorda

Prezıdent Túrkistan oblysynyń ákimi Nuralhan Kósherovti qabyldady, dep habarlaıdy qandastar.kz

Kezdesý barysynda Qasym-Jomart Toqaevqa Túrkistan oblysynyń byltyrǵy áleýmettik-ekonomıkalyq damý kórsetkishteri men aldaǵy kezeńge arnalǵan jospary baıandaldy.

Oblys ákimi ırrıgaııa nysandaryn qaıta qalpyna keltirý úshin Islam damý bankinen qarjy tartylyp jatqany jóninde málimet berdi. Qazirgi kezde 135,5 mıllıard teńgege 24 jobany qarjylandyrý maquldandy. Budan bólek, Túrkistan qalasyn jáne jaqyn mańdaǵy 6 aýdandy sýmen turaqty qamtamasyz etý maqsatynda «Báıdibek ata» sý qoımasynyń qurylysy júrgizilip, «Boraldaı» sý qoımasynyń jobasy ázirlenip jatyr.

Nuralhan Kósherovtiń aıtýynsha, aýyl sharýashylyǵy salasynda maqta, júgeri jáne et klasterlerin damytýǵa aıryqsha mán beriledi. Atap aıtqanda, maqta-toqyma klasterinde quny 197 mıllıard teńgeni quraıtyn 5 joba iske asyrylmaq. Sonymen qatar Júgeri-sirne zaýytynyń qurylysy bastalyp, Avstralııa tájirıbesine saı et baǵytyndaǵy mal sharýashylyǵyn damytý qolǵa alyndy.

Búgingi tańda energetıka tapshylyǵyn sheshý maqsatynda jalpy qýaty 2,4 GVt-ty quraıtyn 6 jobany iske asyrý kózdelip otyr. Sonymen qatar ındýstrııalyq aımaqtardy qajetti ınfraqurylymmen qamtý úshin tıisti jumystar atqarylady.

Nuralhan Kósherov bıyl óńirde 32 mektep salynyp, 41 bilim oshaǵyna kúrdeli jóndeý júrgiziletinin aıtty. Sondaı-aq medıınalyq-sanıtarlyq alǵashqy kómek kórsetetin 32 nysan paıdalanýǵa berilip, 45 eldi mekenge tabıǵı gaz qubyry tartylýǵa tıis.

Qasym-Jomart Toqaev oblystyń jańa basshysyna keshe qol qoıylǵan «Túrkistan qalasynyń erekshe mártebesi týraly» zańda aıqyndalǵan mindetterdi sapaly júzege asyrý úshin Úkimetpen tyǵyz qarym-qatynasta jumys isteýdi tapsyrdy.

Sonymen qatar Prezıdent oblys turǵyndarynyń turmys deńgeıin jaqsartý, týrızm, aýyl sharýashylyǵy jáne shaǵyn kásipkerlik baǵyttaryn damytý, eldi mekenderdi aýyz sýmen tolyqtaı qamtamasyz etý mindetterin júktedi.