پرەزيدەنت: ۇكىمەت جۇمىسىن ازاماتتاردىڭ تۇرمىس ساپاسىنا قاراي باعالايمىز

فوتو: اشىق دەرەككوز

مەملەكەت باسشىسى قاسىم-جومارت توقاەۆتىڭ توراعالىعىمەن وتەتىن ۇكىمەتتىڭ كەڭەيتىلگەن وتىرىسى باستالدى, دەپ جازدى qandastar.kz

ماڭىزدى جيىندا ەلىمىزدىڭ 2024 جىلعى الەۋمەتتىك-ەكونوميكالىق دامۋى قورىتىندىلانىپ, الداعى كەزەڭگە ارنالعان نەگىزگى مىندەتتەر ايقىندالادى.

«بۇگىن ءبىز ۇكىمەتتىڭ كەڭەيتىلگەن وتىرىسىندا وتە وزەكتى ماسەلەلەرگە توقتالامىز. سەبەپ – بارىمىزگە بەلگىلى. قازىر دۇنيەجۇزى تۇبەگەيلى وزگەرىسكە ۇشىراپ جاتىر. جاھاندىق ۇدەرىستەر, ەڭ الدىمەن, ەلىمىزدىڭ ەكونوميكالىق احۋالىنا اسەرىن تيگىزەتىنى انىق.

جاپپاي تسيفرلاندىرۋ ءداۋىرى, ياعني جاڭا تەحنولوگيالىق كەزەڭ باستالدى. كۇللى الەم مۇلدەم باسقا جاعدايدا ءومىر سۇرەدى. ءبىز سوعان مىندەتتى تۇردە دايىن بولۋىمىز كەرەك. جاڭا تەحنولوگيالىق احۋالعا ساقاداي ساي تۇرۋىمىز قاجەت. بۇل – ەلىمىزدىڭ باسەكەگە قابىلەتىن ارتتىرىپ, تۇراقتى دامۋىنا جول اشاتىن اسا ماڭىزدى فاكتور.

ۇكىمەت پەن اكىمدەردىڭ جۇمىسى قانشالىقتى ءتيىمدى ەكەنىن الدىمەن ەكونوميكانىڭ دامۋ كورسەتكىشتەرى مەن ازاماتتاردىڭ تۇرمىس ساپاسىنا قاراي باعالايمىز. وسى جۇمىستىڭ ناتيجەسى بىلتىر قانداي بولدى? نەگىزگى مىندەتتەر ورىندالدى ما? بۇگىن وسى سۇراقتارعا توقتالامىز جانە جاقىن ارادا شەشىمىن تابۋعا ءتيىس وزەكتى ماسەلەلەردى تالقىلايمىز», – دەدى پرەزيدەنت.

كۇن تارتىبىنە سايكەس, جيىندا پرەمەر-مينيستر ولجاس بەكتەنوۆ, پرەمەر-ءمينيستردىڭ ورىنباسارى سەرىك جۇمانعارين, ۇلتتىق بانك توراعاسى تيمۋر سۇلەيمەنوۆ, «سامۇرىق-قازىنا» اق باسقارما توراعاسى نۇرلان جاقىپوۆ, استانا قالاسىنىڭ اكىمى جەڭىس قاسىمبەك, شىمكەنت قالاسىنىڭ اكىمى عابيت سىزدىقبەكوۆ, قىزىلوردا وبلىسىنىڭ اكىمى نۇرلىبەك نالىباەۆ بايانداما جاسايدى.