جاڭالىقتار
پرەزيدەنت ۇلتتىق قاۋىپسىزدىك كوميتەتىنىڭ توراعاسىن قابىلدادى
فوتو: اقوردا
پرەزيدەنتكە ۆەدومستۆونىڭ الداعى كەزەڭگە ارنالعان جوسپارى, سىن-قاتەرلەردى ەسكەرە وتىرىپ ۇلتتىق قاۋىپسىزدىكتى قامتاماسىز ەتۋ بويىنشا قابىلدانىپ جاتقان شەشىمدەرى تۋرالى باياندالدى, — دەپ حابارلايدى qandastar.kz
ۇقك توراعاسى ۇلتتىق قاۋىپسىزدىك ورگاندارىن پەرسپەكتيۆتى دامىتۋ باعىتىندا جۇزەگە اسىرىلىپ جاتقان شارالار, جەدەل قىزمەتتىك ءىس-قيمىلدى ۇيىمداستىرۋ جانە ونىڭ قۇرىلىمىن جەتىلدىرۋ جونىندە مالىمەت بەردى.
قاسىم-جومارت توقاەۆقا ارنايى قىزمەتتى كادرلىق جانە تەحنيكالىق تۇرعىدان نىعايتۋ, نورماتيۆتىك-قۇقىقتىق بازانى جاڭعىرتۋ, سونداي-اق ۇلتتىق قاۋىپسىزدىك كوميتەتىندەگى ۇدەرىستەردى وڭتايلاندىرۋ مەن تسيفرلاندىرۋ جۇمىستارى جايىندا ايتىلدى.
سونىمەن قاتار مەملەكەت باسشىسىنا حالىقارالىق تەرروريزمگە جانە ءدىني ەكسترەميزمگە, ۇيىمداسقان قىلمىسقا, ەسىرتكى بيزنەسىنە قارسى تۇرۋ, كيبەرقاۋىپسىزدىكتى قامتاماسىز ەتۋ, مەملەكەتتىك شەكارانى قورعاۋ جانە كۇزەتۋ سالالارىنداعى جاعداي تۋرالى اقپارات بەرىلدى.
كەزدەسۋ سوڭىندا پرەزيدەنت ۇلتتىق قاۋىپسىزدىك ورگاندارى قىزمەتىنىڭ نەگىزگى باعىتتارى بويىنشا بىرقاتار تاپسىرما بەردى.
