پرەزيدەنت ۇلىتاۋ وبلىسىنىڭ اكىمىن قابىلدادى

فوتو: اقوردا

مەملەكەت باسشىسى ۇلىتاۋ وبلىسىنىڭ اكىمى داستان رىسپەكوۆتى قابىلدادى. پرەزيدەنتكە وبلىستىڭ الەۋمەتتىك-ەكونوميكالىق دامۋىنىڭ قورىتىندىلارى تۋرالى ەسەپ بەرىلىپ, الداعى كەزەڭگە ارنالعان جوسپارى تانىستىرىلدى, دەپ جازدى qandastar.kz

قاسىم-جومارت توقاەۆقا وتكەن جىلى ونەركاسىپ ءوندىرىسى 8 پايىزعا, قۇرىلىس جۇمىستارىنىڭ كولەمى 28 پايىزعا جانە تۇرعىن ءۇيدى پايدالانۋعا بەرۋ كورسەتكىشى 30 پايىزعا وسكەنى جونىندە باياندالدى.

وبلىس اكىمىنىڭ ايتۋىنشا, بىلتىر وڭىرگە 226 ميلليارد تەڭگەدەن استام ينۆەستيتسيا تارتىلعان. ونىڭ 89 پايىزى – جەكە ينۆەستيتسيا. جالپى سوماسى 940 ميلليارد تەڭگە بولاتىن ينۆەستيتسيالىق پۋل جاساقتالدى. بيىل قۇنى 138 ميلليارد تەڭگەنى قۇرايتىن 17 جوبانى ىسكە اسىرۋ جوسپارلانىپ وتىر. بۇل ورايدا قۇرىلىس, ساۋدا, لوگيستيكا, ەنەرگيانىڭ بالاما كوزدەرى جانە تۋريزم سالالارى ينۆەستيتسيا تارتۋعا ايتارلىقتاي تارتىمدى دەپ تانىلعان.

مەملەكەت باسشىسىنا جىلىتۋ ماۋسىمىنىڭ بارىسى جانە «تازا قازاقستان» ەكولوگيالىق اكتسياسىن وتكىزۋ جايىندا مالىمەت بەرىلدى.

پرەزيدەنتكە قاتەرلى ءوندىرىس ورىندارىندا ەڭبەك ەتەتىن ازاماتتاردىڭ قاۋىپسىزدىگىن ساقتاۋ باعىتىندا بۇعان دەيىن بەرگەن تاپسىرماسىنا ساي اتقارىلىپ جاتقان جۇمىستار تۋرالى باياندالدى. ءتيىستى شارالاردى اكىمدىك ۇكىمەتپەن بىرلەسىپ جۇرگىزۋدە. داستان رىسپەكوۆ «قازاقمىس» كورپوراتسياسىنىڭ كەنىشىندە تاياۋدا بولعان اپات سالدارىنان قازا تاپقان شاحتەرلەردىڭ وتباسىلارىنا قانداي كومەك كورسەتىلىپ جاتقانىن ايتتى.

قاسىم-جومارت توقاەۆ بيزنەستىڭ الەۋمەتتىك جاۋاپكەرشىلىگىن ارتتىرۋ ءۇشىن جەر قويناۋىن پايدالانۋشى ءىرى كومپانيالارمەن جۇمىستى جالعاستىرۋدىڭ ماڭىزدى ەكەنىن اتاپ ءوتتى.

وبلىس اكىمىنە كولىك-لوگيستيكا الەۋەتىن ارتتىرۋ, ينفراقۇرىلىمدى جاڭعىرتۋ, ساپالى مەديتسينالىق قىزمەت كورسەتۋ, حالىقتى تازا اۋىزسۋمەن قامتاماسىز ەتۋ جانە ەكولوگيالىق ماسەلەلەردى شەشۋ جونىندە تاپسىرما بەرىلدى.