جاڭالىقتار
پرەزيدەنت ءۇش دۇركىن الەم چەمپيونى اتانعان نازىم قىزايبايدى قۇتتىقتادى
ول 48 كەلىگە دەيىنگى سالماقتا ءساتتى ونەر كورسەتتى.
قازاقستاندىق بوكسشى اقتىق سىندا رەسەيلىك يۋليا چۋمگالاكوۆامەن كەزدەستى. ءۇش راۋندتىڭ قورىتىندىسى بويىنشا نازىم ايقىن باسىمدىقپەن جەڭدى.
وسىلايشا نازىم قىزايباي ءۇشىنشى رەت الەم چەمپيوناتىنىڭ فينالىندا جەڭىسكە جەتتى. بۇعان دەيىن ول 2014 جانە 2016 جىلى جەڭىس تۇعىرىنىڭ بيىگىنە كوتەرىلگەن ەدى. ايتا كەتەيىك بۇعان دەيىن ناتاليا بوگدانوۆا (70 كەلى) قولا جۇلدە جەڭىپ الدى.
پرەزيدەنت قاسىم-جومارت توقاەۆ قازاقستاندىق بوكسشى نازىم قىزايبايدى تاريحي جەڭىسىمەن قۇتتىقتادى.
– نازىم قىزايبايدى وتاندىق بوكس تاريحىندا تۇڭعىش رەت ءۇش دۇركىن الەم چەمپيونى بولۋىمەن قۇتتىقتايمىن. بۇل – ايتۋلى جەتىستىك!
سەربيادا ءوتىپ جاتقان الەم بىرىنشىلىگىندە ۇزدىك ناتيجە كورسەتكەن ۇلتتىق قۇراما مۇشەلەرىنە العىس ايتامىن. سپورتشى قىزدارىمىزدىڭ الداعى ۋاقىتتا دا ۇلكەن جەڭىستەرگە جەتە بەرۋىنە تىلەكتەستىك بىلدىرەمىن, – دەپ جازدى مەملەكەت باسشىسى Instagram الەۋمەتتىك جەلىسىندەگى ءوزىنىڭ پاراقشاسىندا.
