پرەزيدەنت: “جاڭا ادامدار” — جاڭا قوعامنىڭ ايناسى

فوتو: اقوردا

فورۋمدا «جاڭا ادامدار» قوزعالىسىنىڭ جەتەكشىسى اسەل بادەنوۆا پرەزيدەنتكە ۇيىم قۇرىلعالى بەرى قوزعالىستىڭ اتقارعان يگى ىستەرى مەن ازاماتتىق باستامالارىن تانىستىردى, دەپ جازدى qandastar.kz

ونىڭ ايتۋىنشا, قازىرگى كەزدە قوزعالىستىڭ 19 قالادا كامپۋسى, 15 مىڭعا جۋىق بەلسەندى مۇشەسى بار. قوزعالىس ەلىمىزدە ونداعان ازاماتتىق باستامالار مەن اكتسيالاردى ۇيىمداستىرىپ ۇلگەرگەن. جاستار ۆانداليزممەن, رۇقسات ەتىلمەگەن جەرگە قوقىس توگۋشىلەرمەن, كامەلەتكە تولماعان بالالارعا ىشىمدىك ساتۋشىلارمەن, ەسىرتكى تاراتۋشىلارمەن جانە باسقا دا الەۋمەتتىك كەسەلدەرمەن كۇرەس جۇرگىزىپ, وزدەرىنىڭ ازاماتتىق ۇستانىمدارىن اشىق ءارى بەلسەندى ءبىلدىرىپ ءجۇر.

مەملەكەت باسشىسى فورۋمعا جينالعان جالىندى جاستاردىڭ بويىنداعى وتانعا, ەلگە دەگەن سۇيىسپەنشىلىك پەن قۇرمەتكە ريزاشىلىعىن ءبىلدىرىپ, كوزى اشىق, كوكىرەگى وياۋ ازاماتتاردىڭ ءار جەتىستىگىنە قۋاناتىنىن, ءار باستاماسىن قولدايتىنىن جەتكىزدى.

– قازاقستاننىڭ جاستارى – جاسامپاز. مەن مۇنى ۇنەمى ايتىپ ءجۇرمىن. جاڭا عانا وتە جاقسى ويلار ايتىلدى. تىڭ يدەيالار, يگى باستامالار بار. سىزدەردىڭ سوزدەرىڭىزدى تىڭداپ, فورۋم اتموسفەراسىن سەزىنە وتىرىپ, كەۋدەمدى ماقتانىش كەرنەدى. قازاقستاننىڭ بولاشاعىنا دەگەن سەنىمىم نىعايا ءتۇستى. «جاس كەلسە – ىسكە» دەپ بەكەر ايتپاعان. ەلىمىزدىڭ كەلەشەگى ويى ۇشقىر, ءبىلىمى تەرەڭ, كوزقاراسى زاماناۋي جاستاردىڭ قولىندا. مەن پرەزيدەنت رەتىندە سىزدەرگە زور ۇمىتپەن قارايمىن, – دەدى قاسىم-جومارت توقاەۆ.

پرەزيدەنت قازىر ەلىمىز ءۇشىن تاريحي كەزەڭ ەكەنىنە, الدىمىزدا بيىك ماقساتتار تۇرعانىنا نازار اۋداردى.

– ءبىز جۇرتتان كوش ىلگەرى جۇرەتىن ەل بولامىز. ۇيرەنەتىن دە, ۇيرەتەتىن دە ۇلت بولامىز. جاستار بارلىق وزگەرىستىڭ باستاۋىندا تۇرادى. «جاڭا ادامدار» – جاڭا قوعامنىڭ ايناسى. «جاڭا ادامدار» – جاڭا بولمىس! بۇل – ءوز ەلىنە ادال جاستاردىڭ قوزعالىسى! ءبىزدىڭ ستراتەگيامىزعا قولداۋ بىلدىرگەن سىزدەرگە العىس ايتامىن. رەفورمالارىمىزدىڭ ءمان-ماڭىزى ۇراندارىڭىزدا كورىنىس تاپقان. بۇل وزگەرىستەر ادىلەتتى قازاقستاندى قۇرۋ, «زاڭ مەن ءتارتىپتى» قامتاماسىز ەتۋ تۇجىرىمداماسىنا نەگىزدەلگەن, – دەدى مەملەكەت باسشىسى.
قاسىم-جومارت توقاەۆ جاستارعا قاراتا ايتقان سوزىندە وتانشىلدىق سەزىمگە, قوعامدا «زاڭ مەن ءتارتىپ» ۇستەمدىگىن ورناتۋدىڭ ماڭىزىنا, «تازا قازاقستان» ەكولوگيالىق اكتسياسىنىڭ يدەولوگيالىق مانىنە توقتالدى.

مەملەكەت باسشىسىنىڭ پىكىرىنشە, ەل ءۇشىن ادال قىزمەت ەتۋ جاۋاپكەرشىلىك الۋدان قورىقپايتىن, باتىل ازاماتتاردىڭ قولىنان كەلەتىن جۇمىس.

– جاستارعا بارلىق مۇمكىندىكتەر جاسالىپ جاتىر. قازاقستان بالالار مەن جاستارعا جان-جاقتى قولداۋ كورسەتەتىن الەمدەگى از ەلدىڭ ءبىرى. دۇنيەگە كەلگەن ءار ءسابي بىردەن ۇلتتىق باعدارلامالاردىڭ قاتىسۋشىسىنا اينالادى. وزدەرىڭىزگە ءمالىم, ەكىنشى جىل قاتارىنان ۇلتتىق قور تابىسىنىڭ ءبىر بولىگى بالالاردىڭ ەسەپشوتىنا ءتۇسىپ جاتىر. كامەلەت جاسىنا تولعاندا ولار جيناقتالعان قارجىنى وقۋعا نەمەسە باسپانا الۋعا جۇمساي الادى. بەس جاستان اسقان بالالارعا ارنالعان «كەلەشەك» باعدارلاماسى ىسكە قوسىلدى. بۇل جۇيە اتا-انالار ءۇشىن وتە قولايلى. سول ارقىلى بالالارىنىڭ بولاشاقتا الاڭسىز ءبىلىم الۋىنا قاراجات جينايدى. ءار بالا التى-جەتى جاستان باستاپ مەكتەپتە تەگىن ءبىلىم الادى. مۇنىڭ ءبارى – مەملەكەتتىڭ مىندەتى. بىراق الەمنىڭ بارلىق ەلىندە ءدال وسىلاي ەمەس. باردى باعالاۋ ماڭىزدى. ءبىزدىڭ جەتىستىكتەرىمىز بارشىلىق. ەلىمىزدە باستاۋىش سىنىپ وقۋشىلارىنا تەگىن تاماق بەرىلەتىن بولدى. وقۋشىلارىمىز مەملەكەت ەسەبىنەن ءارتۇرلى ۇيىرمەلەر مەن سەكتسيالارعا قاتىسا الادى. مەكتەپ تۇلەكتەرىنىڭ جوعارى وقۋ ورنىنا نەمەسە كوللەدجگە گرانتقا ءتۇسۋ مۇمكىندىگى زور. سوڭعى جىلدارى گرانت سانىن ايتارلىقتاي ۇلعايتتىق. «بولاشاق» باعدارلاماسىمەن مىڭداعان جاس شەتەلدە ءبىلىم الۋدا. ولار قازاقستانعا كەلگەن سوڭ ەل دامۋىنا ۇلەس قوسادى. «پرەزيدەنتتىك جاستار كادر رەزەرۆى» سۇرانىسقا يە جوباعا اينالدى. كەلەشەكتە مەملەكەتتى باسقارۋشىلاردىڭ نەگىزگى لەگى وسى جاس مامانداردان قالىپتاسادى. ساياسي رەفورمالار اياسىندا ءماجىلىس پەن ءماسليحاتتاردا جاستار ءۇشىن ارنايى كۆوتا ەنگىزىلدى. بۇل وكىلدىك بيلىك قىزمەتىنە تىڭ سەرپىن بەردى. وسى جەرگە جينالعان ءبىلىمپاز, وتانشىل جاستار ءماسليحاتتىڭ نەمەسە پارلامەنتتىڭ قۇرامىنا كىرەتىنىنە, ءتىپتى ۇكىمەتتە جۇمىس ىستەيتىنىنە كامىل سەنەمىن. جاس كاسىپكەرلەر مەن وتباسىلاردى قولداۋعا ايرىقشا ءمان بەرىلەدى. مىسالى, بيزنەستى دامىتۋعا جانە باسپانا الۋعا جەڭىلدىكپەن نەسيە بەرۋ قاراستىرىلعان. بۇل بالالار مەن جاستاردىڭ ومىردەن ءوز ورنىن تابۋىنا جاعداي جاساۋعا باعىتتالعان باعدارلامالار مەن جوبالاردىڭ ءبىر پاراسى عانا, – دەدى پرەزيدەنت.
مەملەكەت باسشىسىنىڭ ايتۋىنشا, ەلىمىزدە زامان تالابىنا ساي بىلىكتى ماماندار وتە كوپ: مۇعالىمدەر, دارىگەرلەر, عالىمدار, ينجەنەرلەر, ونەركاسىپتەگى جۇمىسشىلار جانە باسقا دا ماماندار بار. قازاقستان جاستارى كرەاتيۆتى يندۋستريادا دا كوپتەگەن تابىسقا جەتىپ جاتىر.

– سونداي دارىندى ازاماتتاردىڭ ارقاسىندا بۇكىل الەم جۇرتشىلىعى قازاقستاندى تالانتتى ءارى ەڭبەكقور ادامداردىڭ ەلى دەپ تانيتىن بولدى. مەملەكەت كرەاتيۆتى يندۋستريانىڭ دامۋىنا بارىنشا ىقپال ەتەدى. قازىر ارنايى قور قۇرىلىپ جاتىر. ول ادەبيەت, مۋزىكا, كينو, سەريال جانە كومپيۋتەر ويىندارىنا قاتىستى جوبالاردى جۇيەلى تۇردە قولداۋمەن اينالىسادى. جاستاردىڭ قارىم-قابىلەتىن كورسەتۋىنە بۇل دا ءبىر كەرەمەت مۇمكىندىك. ەڭ باستىسى, ادال ەڭبەك ەتىپ, ادال تابىس تابۋ, ياعني ادال ازامات بولۋ. بيىل – «جۇمىسشى ماماندىقتارى جىلى». ءبىز قوعامدا ەڭبەك ادامىنىڭ ابىروي-بەدەلىن كوتەرىپ جاتىرمىز. ەڭبەك كۋلتىن قالىپتاستىرۋ – اسا ماڭىزدى مىندەت. كەز كەلگەن جۇمىس – قادىرلى. اسىرەسە, جۇمىسشى ماماندىقتارىن يگەرگەن جاستارىمىز زور قۇرمەتكە لايىق, – دەدى مەملەكەت باسشىسى.

اسىم-جومارت توقاەۆ ءسوزىن قورىتىندىلاي كەلە, قازاقستاندى كوركەيتۋ قاستەرلى پارىز ەكەنىن اتاپ ءوتتى. بەرەكەلى بىرلىك پەن جاستاردىڭ جاسامپازدىق قۋاتىنىڭ ارقاسىندا ادىلەتتى قازاقستاندى بىرگە قۇراتىنىمىزعا سەنىم ءبىلدىردى.

فورۋمدا «جاڭا ادامدار» جاستار قوزعالىسىنىڭ الماتى كامپۋسىنىڭ جەتەكشىسى ۆلاديمير يزيۋمنيكوۆ, قوزعالىستىڭ ءباسپاسوز حاتشىسى الپامىس ءابىلوۆ, «تۇمار» ازاماتتىق ناۋقانىنىڭ جەتەكشىسى عاليا تۋزەن, «حالىق قاھارى» ازاماتتىق ناۋقانىنىڭ جەتەكشىسى ءاليحان سارسەنوۆ, «Antitrash» ازاماتتىق ناۋقانىنىڭ جەتەكشىسى باۋىرجان امانوۆ ءسوز سويلەپ, پرەزيدەنت قاسىم-جومارت توقاەۆتىڭ باستاماسىمەن جۇزەگە اسىرىلىپ جاتقان رەفورمالارعا قولداۋ ءبىلدىردى.

ايتا كەتەيىك, بۇعان دەيىن جاڭا ادامدار كاسپيدى قورعاۋعا شاقىرادى.