جاڭالىقتار
پرەزيدەنت جاڭا زاڭعا قول قويدى: ەندى قازاقستاندا قانداي وزگەرىستەر بولادى?
فوتو: اقوردا
ءماجىلىس دەپۋتاتى اسحات ايماعامبەتوۆ پرەزيدەنت قول قويعان جاڭا زاڭدا قانداي وزگەرىستەر بارىن ءتۇسىندىردى, دەپ حابارلايدى qandastar.kz
جاڭا زاڭ دارىندى جاستاردى قولداپ, مەملەكەتتىك ءتىلدى دامىتۋعا مۇمكىندىك جاساپ, جاساندى ينتەللەكتپەن ۇيلەستىرىپ, ءبىلىم بەرۋ جۇيەسىن جەتىلدىرۋگە باعىتتالعان.
ەندى ەڭ بەدەلدى حالىقارالىق عىلىمي جارىستاردا جەڭىمپاز اتانعان وقۋشىلار ۇبت تاپسىرماي-اق مەملەكەتتىك گرانتپەن ۋنيۆەرسيتەتكە تۇسە الادى. بۇل ولاردىڭ ەلدە ءبىلىم الىپ, قازاقستاننىڭ دامۋىنا ۇلەس قوسۋىنا جول اشادى. بۇرىن مۇنداي مۇمكىندىك تەك وليمپيادا جەڭىمپازدارىنا عانا بەرىلەتىن.
«بولاشاق» باعدارلاماسى كەڭەيتىلىپ, ەندى باكالاۆريات دەڭگەيىندە دە بەرىلەدى. بۇرىن «بولاشاق» ستيپەندياسى تەك ماگيستراتۋرا مەن دوكتورانتۋراعا ارنالعان بولسا, ەندى حالىقارالىق وليمپيادا جەڭىمپازدارى باكالاۆريات دەڭگەيىندە دە وقۋ مۇمكىندىگىنە يە بولادى.
قازاق ءتىلى ءۇشىن جاڭا تسيفرلىق پلاتفورما جاسالادى. قازاق ءتىلىنىڭ تسيفرلىق ۇلتتىق سوزدىك قورى جانە ۇلتتىق ءتىل كورپۋسى زاڭمەن رەتتەلدى. بۇل جاساندى ينتەللەكتتەردىڭ (ChatGPT, اليسا جانە ت.ب.) قازاق تىلىندە ساپالى جۇمىس ىستەۋىنە مۇمكىندىك بەرەدى. مەملەكەت باسشىسى ق. توقاەۆ بۇل ماڭىزدى ماسەلەنى ءوز باقىلاۋىندا ۇستاۋدا.
Dalanews.kz جازعانداي, قازاق ءتىلىنىڭ بارلىق نورمالارى مەن ەرەجەلەرى ونلاين اشىق جۇيەدە قولجەتىمدى بولادى. بۇل باستامانىڭ باستى ماقساتى – قازاق ءتىلىن جاساندى ينتەللەكتپەن ۇيلەستىرۋ جانە تسيفرلىق الەمدە ونىڭ ساپالى جۇمىس ىستەۋىنە جاعداي جاساۋ.
تسيفرلىق سوزدىك قوردىڭ ماڭىزى:
- جاساندى ينتەللەكت ءۇشىن بازا:بۇل سوزدىك قور جاساندى ينتەللەكتكە قازاق تىلىندە دۇرىس سويلەۋدى, سوزدەردى كونتەكستكە ساي قولدانۋدى ۇيرەتەدى.
- كۇندەلىكتى قولدانىس: اشىق اقپاراتتىق جۇيە ارقىلى كەز كەلگەن ازامات سوزدەردىڭ دۇرىس ەملەسىن, ناقتى ماعىناسىن وڭاي تابا الادى.
- ءبىلىم بەرۋ: وقۋشىلار, ستۋدەنتتەر مەن مۇعالىمدەرگە ساپالى سوزدىكتەر مەن انىقتامالىقتارعا قول جەتكىزۋ مۇمكىندىگى بەرىلەدى. بۇل وقۋ مەن وقىتۋ ۇدەرىسىن جەڭىلدەتەدى.
تسيفرلىق سوزدىك قور – بۇل جاي عانا سوزدەردىڭ ءتىزىمى ەمەس. بۇل – ءتىلدى تۇسىنەتىن, ونى دۇرىس قولدانا الاتىن ينتەللەكتۋالدى پلاتفورما.
