پرەزيدەنت جاساندى ينتەللەكتتىڭ باستى الەۋەتىن اتادى

مەملەكەت باسشىسى جي قازىرگى زامانداعى پروگرەستىڭ ەڭ باستى قوزعاۋشى كۇشتەرىنىڭ ءبىرى سانالاتىنىن ءارى ەكونوميكانى تۇبەگەيلى وزگەرتە الاتىنىن اتاپ ءوتتى, دەپ جازدى qandastar.kz

پرەزيدەنت قاسىم-جومارت توقاەۆ بىرىككەن اراب امىرلىكتەرىنە جۇمىس ساپارى بارىسىندا ساراپشىلارمەن جاساندى ينتەللەكتتى (جي) دامىتۋ ماسەلەسىن تالقىلادى.مەملەكەت باسشىسى جي قازىرگى زامانداعى پروگرەستىڭ ەڭ باستى قوزعاۋشى كۇشتەرىنىڭ ءبىرى سانالاتىنىن ءارى ەكونوميكانى تۇبەگەيلى وزگەرتە الاتىنىن اتاپ ءوتتى.

– قازاقستاندا جاساندى ينتەللەكتتى ىلگەرىلەتۋگە بەرىك نەگىز قالاۋ ءۇشىن ماڭىزدى قادامدار جاسالىپ جاتىر. ينستيتۋتسيونالدىق ورتا قالىپتاستىرۋعا, ينفراقۇرىلىم مەن ادام كاپيتالىن دامىتۋعا باسا ءمان بەرىلىپ وتىر. ينستيتۋتسيونالدىق قۇرىلىم اياسىندا جاساندى ينتەللەكت جونىندەگى حالىقارالىق كونسۋلتاتيۆتىك كەڭەس قۇرىلادى. وعان ءوزىم جەتەكشىلىك جاسايمىن. بۇل كەڭەس الەمدىك دەڭگەيدەگى ساراپشىلارمەن ديالوگ جۇرگىزىپ, پىكىر الماساتىن ستراتەگيالىق الاڭعا اينالادى. جي سالاسىنداعى ۇلتتىق ساياساتقا قاتىستى ۇسىنىمدار ازىرلەپ, حالىقارالىق ىنتىماقتاستىقتى نىعايتۋ ماقساتىندا ونىڭ جۇمىسىنا ينجەنەرلەر, زەرتتەۋشىلەر مەن كاسىپكەرلەر كەڭىنەن تارتىلادى, – دەدى پرەزيدەنت.

قاسىم-جومارت توقاەۆ قازاقستان جي سالاسىنا جوعارى ساناتتى مامان دايارلاۋ جانە قولداۋ ىسىنە ايرىقشا باسىمدىق بەرىپ وتىرعانىنا توقتالدى. پرەزيدەنتتىڭ ايتۋىنشا, جي-ءدىڭ قولدانىسقا تابىستى ەنۋى وسىنداي تەحنولوگيالاردى ازىرلەيتىن جانە پايدالاناتىن ادامداردىڭ بىلىكتىلىگى مەن تاجىريبەسىنە تىكەلەي بايلانىستى.

مەملەكەت باسشىسى ەلىمىزدە AlemAI وزىق تەحنولوگيالار ورتالىعى قۇرىلعانىن مالىمدەدى. ورتالىق الەمدەگى ۇزدىك تاجىريبەلەردى يگەرىپ, يننوۆاتسيالىق شەشىمدەردىڭ ەنگىزىلۋىنە ىقپال ەتەدى

پرەزيدەنت جاساندى ينتەللەكتكە بايلانىستى باستامالاردى جۇزەگە اسىراتىن حابتا مەكتەپتەرگە, ۋنيۆەرسيتەتتەرگە جانە كاسىبي دايارلىق ورتالىقتارىنا ارنالعان ءبىلىم بەرۋ باعدارلامالارى جاساقتالاتىنىن ايتتى. سونداي-اق وندا زەرتتەۋشىلەرگە, ستارتاپتار مەن كومپانيالارعا ارنالعان كەڭسەلەر, تاجىريبە الماسۋ الاڭدارى ورنالاسادى.

– ءبىز جي سالاسىنداعى ادام كاپيتالىن دامىتۋ ماقساتىندا AI-Sana دەپ اتالاتىن يننوۆاتسيالىق ءبىلىم بەرۋ باعدارلاماسىن جاسادىق. باعدارلاما ءتۇرلى سالا ماماندارىنىڭ پانارالىق دايارلىعىن قامتاماسىز ەتەدى جانە جي-گە قاتىستى وزىق شەشىمدەردى ازىرلەۋگە سەپتىگىن تيگىزەدى, – دەدى پرەزيدەنت.

قاسىم-جومارت توقاەۆ ءسوز سوڭىندا قازاقستان جاھاندىق جاساندى ينتەللەكت ەكوجۇيەسىنىڭ بەلسەندى مۇشەسى بولۋعا ۇمتىلاتىنىن جەتكىزدى. سونىمەن قاتار كەزدەسۋگە قاتىسۋشىلاردى عىلىمي زەرتتەۋدەن باستاپ ەتيكالىق ستاندارتتاردى بەكىتۋگە دەيىنگى سان سالالى جۇمىسقا اتسالىسۋعا شاقىردى.

جيىنعا Polynome كومپانياسىنىڭ نەگىزىن قالاۋشى الەكساندر حانين, G42 كومپانياسىنىڭ جاساندى ينتەللەكت جونىندەگى باس ديرەكتورى دجەكسون ەندريۋ, ابۋ دابيدەگى حاليفا عىلىم جانە تەحنولوگيا ۋنيۆەرسيتەتىنىڭ پروفەسسورى دەببا مەرۋان, بۇۇ-نىڭ «يگىلىككە ارنالعان جي» باستاماسى اتقارۋشى كەڭەسىنىڭ توراعاسى ءال مازرۋي ەبتەسام, Core42 كومپانياسىنىڭ مەملەكەت ىستەرى جانە سەرىكتەستىك جونىندەگى ديرەكتورى ءال كايسسي تالال, مۇحاممەد بەن زايد اتىنداعى جاساندى ينتەللەكت ۋنيۆەرسيتەتىنىڭ رەكتورى جانە پروفەسسورى تيماتي بولدۋين, Saalai كومپانياسىنىڭ جاساندى ينتەللەكت ءبولىمىنىڭ جەتەكشىسى ابدۋلنابي ابرار, Mubadala Investment Company ۆەنچۋرلىق جوبالار جانە دامۋ ءبولىمىنىڭ جەتەكشىسى ءال مازرۋي فاريس سۋحەيل قاتىسىپ, پىكىر ءبىلدىردى.