پرەزيدەنت جاستاردىڭ كرەاتيۆتى يندۋستريادا تابىسقا جەتىپ جاتقانىن ايتتى

فوتو: اقوردا

“جاڭا ادامدار” جاستار فورۋمىندا پرەزيدەنت وسى ماسەلەنى ايرىقشا كوتەردى, دەپ جازدى qandastar.kz

مەملەكەت باسشىسىنىڭ ايتۋىنشا, ەلىمىزدە زامان تالابىنا ساي بىلىكتى ماماندار وتە كوپ.

“مۇعالىمدەر, دارىگەرلەر, عالىمدار, ينجەنەرلەر, ونەركاسىپتەگى جۇمىسشىلار جانە باسقا دا ماماندار بار. قازاقستان جاستارى كرەاتيۆتى يندۋستريادا دا كوپتەگەن تابىسقا جەتىپ جاتىر.

سونداي دارىندى ازاماتتاردىڭ ارقاسىندا بۇكىل الەم جۇرتشىلىعى قازاقستاندى تالانتتى ءارى ەڭبەكقور ادامداردىڭ ەلى دەپ تانيتىن بولدى. مەملەكەت كرەاتيۆتى يندۋستريانىڭ دامۋىنا بارىنشا ىقپال ەتەدى. قازىر ارنايى قور قۇرىلىپ جاتىر. ول ادەبيەت, مۋزىكا, كينو, سەريال جانە كومپيۋتەر ويىندارىنا قاتىستى جوبالاردى جۇيەلى تۇردە قولداۋمەن اينالىسادى.

جاستاردىڭ قارىم-قابىلەتىن كورسەتۋىنە بۇل دا ءبىر كەرەمەت مۇمكىندىك. ەڭ باستىسى, ادال ەڭبەك ەتىپ, ادال تابىس تابۋ, ياعني ادال ازامات بولۋ», — دەدى مەملەكەت باسشىسى.