پرەزيدەنت جاۋاپ بەردى: قازاقستاننىڭ بۇۇ رەفورماسىنا ۇستانىمى قانداي?

فوتو: اقوردا

حالىقارالىق فورۋمدا مەملەكەت باسشىسى بۇۇ رەفورماسىنا قاتىستى قازاقستاننىڭ ۇستانىمىن ءبولىستى, دەپ جازدى qandastar.kz

– ايتسە دە, بۇۇ-نىڭ نەگىزگى تارماقتارى, اسىرەسە قاۋىپسىزدىك كەڭەسى ءالى كۇنگە دەيىن وزگەرگەن جوق. 80 جىل بۇرىن قالىپتاسقان ينستيتۋتسيونالدى قۇرىلىم مەن قازىرگى زامان اراسىندا ۇلكەن الشاقتىق بار. بۇل جاعداي ۇيىمنىڭ تيىمدىلىگىنە جانە وعان دەگەن سەنىمگە سەلكەۋ تۇسىرەدى, – دەدى پرەزيدەنت.

قاسىم-جومارت توقاەۆتىڭ ايتۋىنشا, ميللياردتاعان ادامنىڭ تاعدىرىنا اسەر ەتەتىن اسا ماڭىزدى شەشىمدەردى ساناۋلى عانا ەلدىڭ قابىلداۋى دۇرىس ەمەس. وسىعان بايلانىستى قازاقستان بۇۇ قاۋىپسىزدىك كەڭەسىنىڭ قۇرامىن كەڭەيتىپ, وعان الەمنىڭ ءار وڭىرىنەن وكىل قوسۋ تۋرالى ۇستانىمدى قولدايدى.

– بۇۇ وزەكتىلىگىن ساقتاپ, زامان تالابىنا ساي بولۋى ءۇشىن قاۋىپسىزدىك كەڭەسىنە قۇرىلىمدىق رەفورما قاجەت. الپاۋىت ەلدەر بەيبىتشىلىك پەن قاۋىپسىزدىكتى قامتاماسىز ەتۋگە شىنايى نيەتتى ەكەنىن ناقتى كورسەتۋى ءتيىس. سونىمەن قاتار بارلىق مەملەكەتتىڭ تەرريتوريالىق تۇتاستىعىن قورعاۋ قاعيداتى قاتاڭ ساقتالۋى قاجەت. ءبىز بۇۇ جارعىسىن مۇلتىكسىز ورىنداۋعا ءتيىسپىز. ۇيىمنىڭ نەگىزگى پرينتسيپتەرىنە ءۇستىرت نەمەسە نەمقۇرايلى قاراۋعا بولمايدى. سوندا عانا بۇۇ-عا دەگەن سەنىم مەن قۇرمەت قالپىنا كەلەدى, – دەدى مەملەكەت باسشىسى.