پرەزيدەنت جوعارعى سوت توراعاسى اسلامبەك مەرعاليەۆتى قابىلدادى

مەملەكەت باسشىسىنا سوت جۇيەسى قىزمەتىنىڭ بيىلعى بەس ايداعى قورىتىندىسى جونىندە مالىمەت بەرىلدى, دەپ حابارلادى Qandastar.kz اقپارات پورتالى.

اسلامبەك مەرعاليەۆتىڭ ايتۋىنشا, وتكەن جىلدىڭ ۇقساس كەزەڭىمەن سالىستىرعاندا سوت ورگاندارىنا تۇسكەن تالاپ-ارىز بەن شاعىمدار 18,1 پايىزعا ۇلعايعان. بۇل ازاماتتاردىڭ سوت جۇيەسىنە سەنىمى ارتىپ كەلە جاتقانىن كورسەتەدى. سونىمەن قاتار تاتۋلاستىرۋ ءراسىمىن قولدانۋدا وڭ ديناميكا بايقالادى.

سوت تورەلىگىنىڭ ساپاسى مەن قولجەتىمدىلىگىن ارتتىرۋعا باعىتتالعان جۇيەلى شارالاردىڭ ناتيجەسىندە مەملەكەتپەن اراداعى داۋ كەزىندە ازاماتتاردىڭ قۇقىقتارىن قورعاۋ كورسەتكىشى ەداۋىر جاقساردى. اكىمشىلىك سوتتا قارالعان مۇنداي ىستەردىڭ 57,8 پايىزىندا ۇكىم ازاماتتار مەن زاڭدى تۇلعالاردىڭ پايداسىنا شەشىلدى.

جوعارعى سوت توراعاسى قىلمىستىق پروتسەسس كەزىندە تۇلعانىڭ كونستيتۋتسيالىق قۇقىقتارى مەن بوستاندىعىن قامتاماسىز ەتۋ شارالارى جونىندە باياندادى.

مەملەكەت باسشىسىنىڭ تاپسىرماسىنا سايكەس, قىلمىستىق جانە قىلمىستىق-پروتسەستىك كودەكستەرگە رەۆيزيا جاسالدى. ازاماتتار مەن كاسىپكەرلەردىڭ قۇقىقتارىن كۇشەيتۋدى, تاراپتاردىڭ جارىسپالىلىعى مەن تەڭ قۇقىلىعىن نىعايتۋدى, قىلمىستىق پروتسەستى وڭتايلاندىرىپ, بيۋروكراتيادان ارىلتاۋدى كوزدەيتىن جاڭا زاڭ جوباسى ازىرلەندى.

بۇدان بولەك, پرەزيدەنتكە سوت جۇيەسىن تسيفرلاندىرۋ بارىسى جانە كاسساتسيالىق سوتتاردى قۇرۋ جۇمىستارى اياقتالعانى جونىندە ەسەپ بەرىلدى.

كەزدەسۋ سوڭىندا قاسىم-جومارت توقاەۆ سۋديالار مەن سوت قىزمەتكەرلەرىن تاعى دا كاسىبي مەرەكەلەرىمەن قۇتتىقتادى. پرەزيدەنت زاڭ ۇستەمدىگىن قامتاماسىز ەتىپ, سوت تورەلىگىنىڭ ساپاسىن ارتتىرۋ, سونداي-اق سۋديالاردىڭ تاۋەلسىزدىگى مەن جاۋاپكەرشىلىگىن كۇشەيتۋ ماقساتىندا سوت جۇيەسىن ودان ءارى جەتىلدىرۋ ماڭىزدى ەكەنىنە نازار اۋداردى.