پرەزيدەنتتى كىمدەر قورعايدى?

ارنايى جاساققا ايرىقشا مىندەت جۇكتەلگەن. ولار تاۋلىك بويى مەملەكەت باسشىسىن كۇزەتەدى. ءسويتىپ, پرەزيدەنتتى كىمدەر قورعايدى ەكەن? بۇل «ساردار» مەملەكەتتىك كۇزەت قىزمەتىنىڭ ارنايى ماقساتتاعى جاساعى. سايدىڭ تاسىنداي جىگىتتەردەن قۇرالعان. ولار مەملەكەت باسشىسىنان باستاپ پرەزيدەنت بەكىتكەن ازاماتتاردىڭ جانە سىرتتان كەلگەن قوناقتاردىڭ قاۋىپسىزدىگىنە تىكەلەي جاۋاپتى. ياعني شەتەلدىك ساياساتكەرلەر مەن بەدەلدى تۇلعالار ەل اۋماعىندا جاۋىنگەرلەردىڭ قورعاۋىندا بولادى.

مكق «ساردار» ارنايى ماقساتتاعى جاساعىنىڭ جاۋىنگەرى: – شەتەل قوناقتارىن قر-نىڭ مەملەكەتتىك كۇزەت قىزمەتكەرلەرى ءبىزدىڭ قازاقستاننىڭ اۋە كەڭىستىگىنە كىرگەننەن باستاپ قاۋىپسىزدىگىن ءوز قاراماعىنا الادى. قۇرالايدى كوزگە اتاتىن مەرگەندەردىڭ دە اتقاراتىن قىزمەتى وراسان. ولار مەملەكەت باسشىسى باراتىن اۋماقتاردى الدىن الا زەرتتەپ, قاۋىپسىزدىگىنە كوز جەتكىزەدى. ءار بۇرىش, ءار نۇكتە جاۋىنگەرلەردىڭ نازارىنان تىس قالمايدى.

ارتىنشا بيىك عيماراتتاردىڭ توبەسىنە شىعىپ, ادامداردىڭ قيمىلىن, كوزقاراسىن قاداعالايدى. قانداي دا ءبىر كۇدىك تۋدىرارلىق جايت بايقالسا, بىردەن تومەندەگى ارىپتەستەرىنە حابارلايدى. مەرگەندەر امەريكالىق ءارى ەۋروپالىق زاماناۋي وزىق ۇلگىدەگى ۆينتوۆكالارمەن قارۋلانعان. قورعانىس كيىمدەرىنىڭ ءوزى 30 كەلى شاماسىندا. ولارعا اتىن اتاپ, ءتۇرىن كورسەتۋگە قاتاڭ تۇردە تىيىم سالىنعان.       مكق «ساردار» ارنايى ماقساتتاعى جاساعىنىڭ جاۋىنگەرى: – مەرگەندەردىڭ جۇمىسى دا وتە اۋىر. جۇرگەنىمىزگە 4 ساعات بولدى. مۇنىڭ ءبارى ەلىمىزدىڭ, پرەزيدەنتىمىزدىڭ قاۋىپسىزدىگىن قامتاماسىز ەتۋ ءۇشىن ءبىزدىڭ قىزمەتكەرلەر تەر توگۋدە. مەملەكەتتىك كۇزەت قىزمەتى اسكەري سالانىڭ ىشىندەگى ەڭ ەليتالىق كۇشتىك قۇرىلىم. مۇندا قىزمەت ەتۋ ەكىنىڭ بىرىنە بۇيىرمايتىن باق. سوندىقتان «ساردار» جاۋىنگەرلەرىنە جۇكتەلەتىن مىندەت تە 2 ەسە اۋىر. ساردار ەلىمىزدەگى تاڭداۋلى جاساقتاردىڭ ءبىرى.

ىرىكتەۋ كەزىندە ۇمىتكەرلەرگە قويىلاتىن تالاپ قاتاڭ. بويى 180 سم-دەن جوعارى, ءبىلىمدى, فيزيكالىق دايىندىعى مىقتى جىگىتتەرگە باسىمدىق بەرىلەدى. جانە ەڭ كەمى سپورت شەبەرلىگىنە ۇمىتكەر بولۋى شارت.   مكق «ساردار» ارنايى ماقساتتاعى جاساعىنىڭ جاۋىنگەرى: – «ساردار» شابۋىل توبىنا 2022 جىلى قابىلداندىم. بۇل جەرگە قابىلدانۋ وڭاي بولعان جوق. كوپتەگەن سىناق بار, سونىڭ ءبىرىن تاپسىرىپ, سۇرىنبەي قابىلداندىم.

بۇل جەردە سىناقتار كوبىنەسە فيزيكالىق تۇرعىدا جانە IQ تەست. پسيحولگيالىق تەست. مەملەكەتتىك ءتىلدى جانە ءبىلىمدى قاجەت ەتەدى. ايتا كەتەيىك, كورسەتىلگەن جاتتىعۋلار تەك بەرگى جاعى عانا. نەگىزگى تاكتيكالىق ءىس-قيمىلدارى مەن قولدانىستاعى قارۋ-جاراقتارى قۇپيا ساقتالادى.     اۆتورلارى: مەرەي قاناپيا, ناۋرىزباي قۇرمانعىزى